Sahibkarlıq

Sahibkarlıq

Bu il Sahibkarlığa Kömək Milli Fonduna güzəştli kreditlər üzrə ödəniş 71,5 mln. manat olacaq

25 oktyabr 2010 14:40 (UTC +04:00)

Bakı. Nicat Mustafayev – APA-Economics. Bu il ərzində Azərbaycan İqstiadi İnkişaf Nazirliyinin Sahibkarlığa Kömək Milli Fonduna (SKMF) sahibkarlıq subyektləri tərəfindən götürülən güzəştli kreditlər üzrə ödəniş həcminin 71,5 mln. manat təşkil edəcəyi gözlənilir. «APA-Economics»in məlumatına görə, bunu SKMF-in icraçı direktoru Şirzad Abdullayev bildirib.

Onun sözlərinə görə, 2010-cu ilin yanvar-sentyabr ayları ərzində sahibkarlıq subyektləri tərəfindən Fonda 53,5 mln. manat məbləğində əvvəl götürülmüş kreditlər geri qaytarılıb: «Ümumiyyətlə, hesabat dövründə Fond tərəfindən 1016 sahibkara 81 mln. manat məbləğində güzəştli kreditlər verilib. O cümlədən, cəbhə və sərhəd bölgələrində fəaliyət göstərən sahibkarlara güzəştli kredit şəklində 30,1 mln. manat vəsait ayrılıb».

Ş.Abdullayev onu da qeyd edib ki, hazırda Fond tərəfindən ölkənin müxtəlif bölgələrində 23 soyuducu kameralarının quraşdırılması (ümumi həcmi 70 min ton), 16 taxıl anbarı (266 min ton), 4 südlük iribuynuzlu heyvandarlıq kompleksi (4650 baş), 2 üzüm emalı müəssisəsi (200 min litr), 1 uşaq qidası istehsal müəssisəsi (2 min ton), 9 quşçuluq təsərrüfatı (15 min ton ət və 60 mln. ədəd yumurta) və 4 meyvə emalı müəssisəsinin (1000 ton qur meyvə, 1,2 min ton mürəbbə, 4 min ton cem, 2,4 min ton alma konsentratı) inşasına dair layihələr icra olunur: «Ümumiyyətlə, SKMF tərəfindən maliyyələşdirilən layihələrin artıq 35-i istifadəyə verilib».

Xatırladaq ki, SKMF bank-agentlərə kreditləri illik 1%, banklar isə sahibkarlara 7%-dən çox olmamaq şərti ilə ayırır. Sahibkarlara güzəştli kreditlərin verilməsi müvəkkil kredit təşkilatı kimi seçilmiş 35 kommersiya bankı, 1 bank olmayan kredit təşkilatı və 4 kredit ittifaqı vasitəsilə həyata keçirilir. Kreditin minimal məbləği 1 000 manat, maksimal məbləği isə 3 mln. manat təşkil edir.