Sahibkarlıq

Ana səhifə

Sahibkarlıq

Azərbaycanda əhaliyə göstərilən pullu xidmətlərin həcmi 10,5% artıb

26 oktyabr 2010 11:02 (UTC +04:00)

Bakı. Nicat Mustafayev – APA-Economics. Bu ilin yanvar-sentyabr aylarında Azərbaycanda əhaliyə 3 280,5 mln. manatlıq və ya əvvəlki ilin müvafiq dövrü ilə müqayisədə 10,5% çox pullu xidmət göstərilib.

Dövlət Statistika Komitəsindən «APA-Economics»ə verilən məlumata görə, artımın 60,7%-ni hüquqi şəxslərin müəssisələri təmin edib. Bu sektorun müəssisələri tərəfindən əhaliyə göstərilən pullu xidmətlərin həcmi 2009-cu ilin eyni dövrünün səviyyəsini 8% üstələyərək 2 566,1 mln. manata çatıb.

Hesabat dövründə dövlət mülkiyyəti müəssisələri tərəfindən əhaliyə 917,1 mln. manatlıq, qeyri-dövlət mülkiyyəti müəssisələri tərəfindən isə 2 363,4 mln. manatlıq pullu xidmət göstərilib. Nəticədə, sözügedən pullu xidmətlərin həcmi ötən ilin analoji dövrü ilə müqayisədə müvafiq olaraq 9,1% və 11,1% artıb.

Hesabat dövründə xidmət müəssisələrində hər bir ölkə sakini hər ay orta hesabla 40,7 manatlıq və ya 5,4 manat çox müxtəlif növ pullu xidmətlərdən istifadə edib. Artımın 3,7 manatı (68,5%-i) hüquqi şəxs statuslu müəssisələr üzrə olub.

Əhaliyə göstərilən pullu xidmətlərin 13,1%-ni məişət xidmətləri təşkil edib. Məişət xidmətlərinin 87,1%-i hüquqi şəxs yaratmadan sahibkarlıq fəaliyyəti göstərən fiziki şəxslərin obyektlərində reallaşıb. Hüquqi şəxs yaratmadan sahibkarlıqla məşğul olan fiziki şəxslər pullu xidmətlərin başqa növləri ilə müqayisədə məişət xidmətləri sahəsində daha geniş fəaliyyət göstərib, onlar tərəfindən əhaliyə göstərilən pullu xidmətlərin həcminin 52,5%-ni məişət xidmətləri təşkil edib.