Sahibkarlıq

Ana səhifə

Sahibkarlıq

«Su pərisi» şadlıq sarayında insan orqanizmi üçün təhlükəli olan saxta meyvə şirələri aşkarlanıb

12 noyabr 2010 08:02 (UTC +04:00)

Bakı. Nicat Mustafayev - APA-Economics. Azərbaycan Standartlaşdırma, Metrologiya və Patent üzrə Dövlət Komitəsinin 1 saylı Ərazi Dövlət Nəzarəti İdarəsi tərəfindən qanunvericiliyin tələblərinə uyğun olaraq xidmət sahələrində standartların tələblərinə, məhsulların keyfiyyət və təhlükəsizlik göstəricilərinə riayət olunmasının araşdırılması məqsədilə fiziki şəxs Əliyulla Nağıyevin rəhbərlik etdiyi Bakı şəhəri, Nizami rayonu, C.Naxçıvanski küçəsi ilə Süleymanov küçəsinin kəsişməsində fəaliyyət göstərən «Su pərisi» şadlıq sarayında dövlət nəzarəti tədbirləri həyata keçirilib.

Komitədən «APA-Economics»ə verilən məlumata görə, monitorinq zamanı müəyyən olunub ki, şadlıq sarayında istehlakçılara xarici ölkələrin istehsalı olan «Swell», «Jaffa», «Rıçal su», «Moonlight», «Perrier» əmtəə nişanlı meyvə şirələri və mineral suların saxtaları təqdim olunur. Belə ki, rəsmi idxalçılar tərəfindən təqdim olunmuş orijinal məhsullarla şadlıq sarayından götürülmüş nümunələrin müqayisəsi aparılıb, nəticədə onların çox ciddi fərqlərlə saxta əmtəə nişanlı kontrafakt məhsullar olduğu müəyyən olunub.

Şadlıq sarayından götürülmüş nümunələr sınaqlarının aparılması üçün Komitənin Təcrübə-Sınaq Mərkəzinə (AzTEST) təqdim olunub. Sınaqlar zamanı müəyyən olunub ki, «Swell» saxta əmtəə nişanlı şaftalı və albalı meyvə nektarlarının tərkibində insan orqanizmi üçün təhlükəli sayılan kif və maya göbələkləri mövcuddur. «Rıçal su» saxta əmtəə nişanlı təbii mineral suyun analiz nəticələri göstərib ki, məhsul fiziki göstəricilərindən hidrokarbonat, sulfat ionu, kalsium ionu, xlor ionu və təhlükəsizlik göstəricilərindən ümumi bakteriyaların miqdarına və bağırsaq çöpü bakteriyaların sayına görə standartın tələblərinə uyğun deyil. Təqdim edilmiş «Paytaxt» və «Qarışıq tərəvəz» salatlarının analizi isə məhsullar təhlükəsizlik göstəricilərindən mezofil aerob və fakultativ-anaerob mikroorqanizmlərə, bağırsaq çöpləri qrupundan olan bakteriyaların aşkar edilməsinə görə standartın tələblərinə cavab verməməsi müəyyənləşib.

Müəyyən olunmuş qanun pozuntuları ilə əlaqədar olaraq İnzibati Xətalar Məcəlləsinə əsasən 3 min manat məbləğində cərimə tətbiq edilib, toplanmış faktlar məsələyə hüquqi qiymət verilməsi üçün Azərbaycan Baş Prokurorluğuna göndərilib.