Sahibkarlıq

Ana səhifə

Sahibkarlıq

Lerikdə “Regionlarda sahibkarlığın inkişafına dövlət dəstəyi” tədbiri keçirilib

12 noyabr 2010 12:29 (UTC +04:00)

Bakı - APA-Economics. İqtisadi İnkişaf Nazirliyinin Sahibkarlığa Kömək Milli Fondu sahibkarlığın inkişafına dövlət dəstəyi, sahibkarların investisiya layihələrinin güzəştli şərtlərlə kreditləşdirilməsi və onların maarifləndirilməsi məqsədilə “Regionlarda sahibkarlığın inkişafına dövlət dəstəyi” mövzusunda növbəti tədbirini noyabrın 12-də Lerik rayonunda keçirib.

Nazirlikdən “APA-Economics”ə verilən məlumata görə, tədbirdən əvvəl Sahibkarlığa Kömək Milli Fondundan güzəştli kredit almış Cəlilabad rayonundakı “Cavid-Ş” MMC-nin inşa etdirdiyi tutumu 2 min ton olan müasir soyuducu və “Avanqard” MMC-nin inşa etdirdiyi tutumu 10 min ton olan taxıl anbarı komplekslərində aparılan son tamamlama işlərinə baxış keçirilib.

Sonra “Regionlarda sahibkarlığın inkişafına dövlət dəstəyi” tədbiri öz işinə başlayıb. Lənkəran iqtisadi rayonunda fəaliyyət göstərən 300-ə yaxın sahibkarın iştirak etdiyi tədbiri giriş sözü ilə açan Lerik rayon İcra Hakimiyyəti başçısının müavini Cəlil Baxşıyev son illər regionların sürətlə inkişaf etdiyini, dövlət başçısının regionların inkişafına göstərdiyi xüsusi diqqət və qayğı nəticəsində məşğulluğun səviyyəsinin artdığını, sahibkarlıq fəaliyyətinin genişləndiyini bildirib. Qeyd olunub ki, ölkəmizin digər şəhər və rayonlarında olduğu kimi, Lerikdə də yeni istehsal və xidmət müəssisələri, sosial infrastruktur obyektləri yaradılıb, yeni iş yerləri açılıb.

İİN-in Sahibkarlığın inkişafı siyasəti şöbəsinin müdir müavini Elçin İbrahimov, Regionların inkişafı və dövlət proqramları şöbəsinin baş məsləhətçisi Hüseyn Məmmədov çıxış edərək Azərbaycan prezidenti İlham Əliyev tərəfindən uğurla davam etdirilən sosial-iqtisadi inkişaf strategiyası nəticəsində iqtisadiyyatın bütün sahələrində ciddi nailiyyətlərin qazanıldığını, ölkə rəhbərliyi tərəfindən özəl bölmənin inkişafına böyük diqqət və qayğı göstərildiyini, regionların tarazlı inkişafının təmin olunmasında dövlət proqramlarının uğurlu icrasının əhəmiyyətini vurğulayıblar.

İİN-in Bakı Biznes Tədris Mərkəzinin şöbə müdiri Vidadi Baxışov sahibkarlıq fəaliyyətinin dəstəklənməsi, iş adamlarının maarifləndirilməsi, onlara nəzəri-praktiki biliklərin aşılanması istiqamətində Mərkəzin gördüyü işlər barədə məlumat verib.

Sahibkarlığa Kömək Milli Fondunun icraçı direktoru Şirzad Abdullayev bildirib ki, Fond 2010-cu ilin ötən dövründə 1202 sahibkara 92,6 milyon manat güzəştli kredit verib. Bu kreditlər hesabına 4550-dən çox yeni iş yerinin yaradılması nəzərdə tutulur. Verilmiş kreditlərin 99,8%-i respublikanın regionlarının payına düşür.

Tədbir çərçivəsində Sahibkarlığa Kömək Milli Fondunun güzəştli kreditlərinin verilməsi mexanizmi ilə bağlı sahibkarlar üçün treninq keçirilib, Fondla əməkdaşlıq edən müvəkkil kredit təşkilatları barədə məlumatları əks etdirən broşürlər və investisiya layihələrinin (biznes-planların) hazırlanmasına dair tövsiyə xarakterli materiallar təqdim edilib, sahibkarları maraqlandıran suallar cavablandırılıb.

Tədbir çərçivəsində həmçinin müvəkkil kredit təşkilatları vasitəsilə Lerik və ətraf rayonlarda fəaliyyət göstərən 22 sahibkarlıq subyektinə 230 min manat güzəştli kredit verilib. Bu kreditlər hesabına 40 yeni iş yerinin yaradılması nəzərdə tutulur.