Sahibkarlıq

Ana səhifə

Sahibkarlıq

Bakıda mənşəyi məlum olmayan 2 tona yaxın ət məhsulları aşkarlanıb

18 noyabr 2010 14:58 (UTC +04:00)

Bakı. Nicat Mustafayev – APA-Economics. Azərbaycan Vergilər Nazirliyi yanında Vergi Auditi Departamentinin əməkdaşları tərəfindən Bakı şəhərinin Nəsimi rayonu ərazisində operativ vergi nəzarəti tədbiri keçirilib.

Nazirlikdən «APA-Economics»ə verilən məlumata görə, tədbir zamanı Nəsimi rayonu, Tağızadə küçəsi,45 ünvanda yerləşən Rzaxanov Mirzə Ehtiqat oğluna məxsus obyektdə nəzarət-kassa aparatı tətbiq edilmədən ət məhsullarının saxlanılması, emalı və satışı faktı aşkar edilib. Həmçinin müəyyən edilib ki, obyektdə çalışan 3 şəxs əmək müqaviləsi olmadan işə cəlb edilib. Aşkar edilmiş vergi qanunvericiliyinin pozulması faktlarına görə Vergi Məcəlləsinin müvafiq maddələrinə əsasən aktlar tərtib edilib.

Eyni zamanda, vergi nəzarəti tədbiri zamanı obyektdə olan 2 tona yaxın ət məhsullarının ilkin görünüşü (rəngi və qoxusu) ciddi şübhə doğurub, həmçinin obyektdə sanitariya tələblərinə əməl edilmədiyindən ət məhsullarının keyfiyyətsiz və qida üçün yararsız olması ehtimalı yaranıb. Bununla bağlı aparılan araşdırma zamanı ət məhsullarının mənşəyi barədə heç bir sənədin olmadığı müəyyən edilib. M.Rzaxanov verdiyi yazılı izahatda həmin ət məhsullarını Bakı şəhərinin müxtəlif bazarlarından aldığını və çeşidlərə ayıraraq satışını təşkil etdiyini etiraf edib.

Mənşəyi məlum olmayan ət məhsullarının bazarlara, kolbasa sexlərinə və dönərxanalara yol açması ehtimalını aradan qaldırmaq, həmçinin həmin məhsulların keyfiyyətini və mənşəyini müəyyən etmək məqsədilə vergi orqanları tərəfindən Azərbaycan İqtisadi İnkişaf Nazirliyinin Antiinhisar Siyasəti və İstehlakçıların hüquqlarının müdafiəsi Dövlət Xidmət İdarəsinə müvafiq məlumat verilib.

Faktla bağlı araşdırmalar davam etdirilir.