Sahibkarlıq

Ana səhifə

Sahibkarlıq

Azərbaycanda böyük partiya saxta polietilen torbalar satışdan yığışdırılıb

26 noyabr 2010 09:51 (UTC +04:00)

Bakı - APA-Economics. Azərbaycan İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən növbəti monitorinq keçirilib.

Nazirlikdən «APA-Economics»ə verilən məlumata görə, monitorinq zamanı Sumqayıt şəhəri, 8-ci mikrorayon, ev 16 ünvanında Rəhman İbadova məxsus istehsalat sahəsində polimer torbaların uyğunluq və gigiyenik sertifikatlar olmadan təkrar xammaldan istifadə edilməklə istehsal olunduğu, polimer torbaların üzərində istifadə təyinatına uyğun olaraq lazımi məlumatların qeyd edilmədiyi müəyyən olunub.

Aşkar edilmiş qanun pozuntuları ilə əlaqədar polimer torbaların istehsalının dayandırılması və ticarət şəbəkəsindən geri yığılması, uyğunluq və gigiyenik sertifikatları olmadan istehsal edilmiş, habelə üzərində istifadə təyinatı haqqında məlumatlar göstərilməmiş 960 kq polietilen torbalarının və 460 kq yarımfabrikat halda olan polietilen torbaların satışının qadağan olunması barədə sahibkar Rəhman İbadova icrası məcburi göstəriş verilib.

Sumqayıt şəhəri, 46-cı məhəllədə “Əlirzaoğlu” MMC-yə məxsus sexdə apardığı yoxlama zamanı polimer torbaların uyğunluq və gigiyenik sertifikatları olmadan istehsal edildiyi, polimer torbaların üzərində istifadə təyinatına uyğun olaraq lazımi məlumatların qeyd edilmədiyi müəyyən olunub.

Aşkar edilmiş qanun pozuntuları ilə əlaqədar polimer torbaların istehsalının dayandırılması və ticarət şəbəkəsindən geri yığılması, uyğunluq və gigiyenik sertifikatları olmadan istehsal edilmiş, habelə üzərində istifadə təyinatı haqqında məlumatların göstərilmədiyi 1799 kq polietilen torbanın və 220 kq yarımfabrikat halda olan polietilen torbanın satışının qadağan olunması barədə “Əlirzaoğlu” MMC-yə icrası məcburi göstəriş verilib.

Yoxlama zamanı Bakı şəhəri, Nəsimi rayonu, M.Rəfili küçəsi, ev 19, mənzil 4 ünvanında Nazim Muradova məxsus mağazada 35,4 kq mənşəyi bəlli olmayan polietilen torbaların satıldığı, habelə həmin torbaların üzərində təyinatına uyğun olaraq “Ərzaq malları üçün” və ya “Qeyri-ərzaq malları üçün” sözlərinin qeyd olunmadığı müəyyən edilib.

Bununla əlaqədar mənşəyi bəlli olmayan polietilen torbaların məhv edilməsi barədə Nazim Muradova icrası məcburi göstəriş verilib. Göstərişin icrasının nəticəsi olaraq 35,4 kq mənşəyi bəlli olmayan polietilen torbalar Dövlət Xidmətinin əməkdaşlarının iştirakı ilə qanunvericilikdə müəyyən olunmuş qaydada məhv edilib.

Dövlət Xidməti istehlakçılara aldıqları ərzağın üzərində “Ərzaq malları üçün” sözləri qeyd olunmuş polietilen torbalara qoyulmasına diqqət yetirmələrini tövsiyə edir.