Sahibkarlıq

Ana səhifə

Sahibkarlıq

Azərbaycan “Sahibkarlığa yeni imkanların yaradılması və yeni imkanların açılması məsələləri” mövzusunda Tiflisdə keçirilən konfransda iştirak edir

29 noyabr 2010 13:09 (UTC +04:00)

Tiflis. Nizami Məmmədzadə - APA-Economics. Bu gün Tiflisdə (Gürcüstan) “Sahibkarlığa yeni imkanların yaradılması və yeni imkanların açılması məsələləri” mövzusunda iki günlük konfrans işə başlayıb.

“APA-Economics”in Gürcüstan bürosunun məlumatına görə, konfransda Beynəlxalq Maliyyə Korporasiyasının (IFC) Şərqi Avropa və Mərkəzi Asiya üzrə direktoru xanım Snejana Stoiljoviç “İslahatın uzunmüddətli inkişafının həyata keçirilməsi” mövzusunda əsas məruzə ilə çıxış edib.

Sonra Gürcüstanın baş naziri Nika Gilauri və Dünya Bankının Cənubi Qafqaz üzrə baş direktoru Əsəd Salam mövzu ətrafında çıxış ediblər. N.Gilauri qeyd edib ki, Gürcüstan parlamentinə “Azadlıq aktı” adlı qanun layihəsi təqdim olunub: “İstəyirik ki, hər bir investisiya sahibi əmin olsun ki, onlar üçün ölkədə istənilən şərait yaradılacaq. İnvestorun inamı olmalıdır ki, ölkədə vəziyyət sabit qalacaq. Buna görə də Gürcüstanda müxtəlif biznes sahələri inkişaf etməyə başlayıb, 32 ölkə ilə biznesin inkişafı barədə müqavilə bağlamışıq, daha 24 ölkənin sahibkarları və şirkətləri ilə müqavilələrin bağlanması nəzərdə tutulub. Gürcüstan eyni zamanda Azərbaycanla 10 il müddətinə qaz təminatı barədə müqavilə imzalayıb”.

Sonra baş nazir konfrans nümayəndələrinin suallarını cavablandırıb. Azərbaycanın Gürcüstandakı səfirliyinin müşaviri Şövqi Mehdizadənin “Orta və kiçik sahibkarlığının inkişafı barədə Gürcüstan hökuməti hansı addımlar atmağı nəzərdə tutub” sualını cavablandıran baş nazir bildirib ki, bu barədə konkret proqram yoxdur: “Yeni Vergi Məcəlləsi çərçivəsində daha asanlaşdırılmış vergi şəraiti nəzərdə tutulub. Gürcüstanda iki sahədə - gömrük və polis sistemində islahatlar baş tutub. Gömrük sahəsində keçirilən islahatlar nisbətən gec həyata keçirildi, lakin polis sahəsində islahatların daha çox effekti oldu”.

Konfransda 30 ölkədən nümayəndələr iştirak edir. Tədbirdə Azərbaycanı dörd nəfərlik nümayəndə heyəti - vergilər nazirinin müavini Sahib Ələkbərov, Nazirlər Kabinetinin iqtisadiyyat şöbəsinin müdiri Şahin Sadıxov və Vergilər Nazirliyinin iki əməkdaşı təmsil edir. Sessiyada Azərbaycan Vergilər Nazirliyinin biznes qeydiyyatı departamentinin hüquqşünası Aysu Əliyeva “Azərbaycanda vahid pəncərə sisteminin tətbiq olunması barədə” layihənin təqdimatını keçirib.

Azərbaycan vergilər nazirinin müavini Sahib Ələkbərov jurnalistlərə açıqlamasında bildirib ki, Azərbaycanın “vahid pəncərə” sisteminə keçidlə əlaqədar təcrübəsi bir çox dünya ölkələri tərəfindən təqdir olunur və qəbul olunur: “Hesab edirəm ki, konfrans çox maraqlı və faydalıdır. Konfransda konkret məsələlər, o cümlədən reyestr xidmətinin təşkil olunması, tikintiyə icazə verilməsi qaydaları və s. barədə fikir mübadiləsi aparıldı. Bu barədə praktiki təcrübələr var. Biz çalışırıq ki, dünyanın hər yerində yaxşı nə varsa, onlara baxaq və özümüzdə olan təcrübə ilə müqayisə edək. Əgər bizim üçün yararlı və faydalıdırsa, ondan işimizdə istifadə etməyə çalışırıq”.