Sahibkarlıq

Ana səhifə

Sahibkarlıq

Bakıda Şərqi Avropa və Mərkəzi Asiya Biznes İnkubatorları və Texnologiya Parkları Şəbəkəsinin konfransı keçirilir

02 dekabr 2010 11:47 (UTC +04:00)

Bakı. Nicat Mustafayev – APA-Economics. Bu gün Bakıda «ECA 2010-da Yüksək İnnovasiya: Gənc sahibkarlar və yeni biznesin təşkili üçün investisiya hazırlığı və biznesin inkubasiya infrastrukturunun möhkəmləndirilməsi» Şərqi Avropa və Mərkəzi Asiya Biznes İnkubatorları və Texnologiya Parkları Şəbəkəsinin (ECAbit) V Beynəlxalq Konfransı işə başlayıb.

«APA-Economics»in məlumatına görə, tədbirdə çıxış edən Azərbaycanın gənclər və idman nazirinin müavini İntiqam Babayev tədbirin əhəmiyyətindən danışıb və gənc sahibkarların bu sahədə rolunun tapılmasında və istiqamətləndirilməsində Nazirlik tərəfindən lazımi tədbirlərin görüldüyünü bildirib. İ.Babayev həmçinin qeyd edib ki, tədbirdə 15 ölkədən 20-yə yaxın nümayəndə iştirak edir.

Tədbirdə çıxış edən Dünya Bankının (DB) «InfoDev» («Information for Development») proqramının regional koordinatoru Ştefan Şandera qeyd edib ki, bir çox ölkələrdə olduğu kimi DB Azərbaycanla da bu sahədə əməkdaşlıq etmək və mobil sosial şəbəkə yaratmaqda maraqlıdır.

Öz növbəsində çıxış edən Azərbaycan Sahibkarlar Konfederasiyasının (ASK) sədri Məmməd Musayev Azərbaycanın iqtisadi inkişafından danışıb və qeyd edib ki, hazırda ölkədə özəl sahibkarların ÜDM-də xüsusi çəkisi 85% təşkil edir.

Tədbirdə çıxış edən Xəzər İnvestisiya Mərkəzinin (CIC) prezidenti Elşən Musayev qeyd edib ki, tezliklə Azərbaycanda Beyənlxalq İnnovasiya Mərkəzinin yaradılması nəzərdə tutulub.

E.Musayev onu da bildirib ki, artıq bir sıra ölkələrdə «biznes mələkləri» fəaliyyət göstərir: «Onların fəaliyyəti gənc sahibkarların səmərəli biznes-layihələri olduqda və bu layihənin icrası üçün vəsait olmadıqda maddi yardım göstərməkdən ibarətdir. Ümid edirəm ki, Azərbaycanda da analoji fəaliyyət yaradılacaq».

Tədbirdə çıxış edən ECAbit-in koordinatoru Todor Yalamov öz növbəsində bildirib ki, iki gün davam edəcək konfransda gələcəkdə sahibkarıqla məşğul olmaq istyən gənclər üçün müxtəlif təlimlər keçiriləcək.

Qeyd edək ki, konfrans Azərbaycan Gənclər və İdman Nazirliyi, CIC, ASK və «InfoDev»in təşkilatçılığı ilə keçirilir.