Sahibkarlıq

Ana səhifə

Sahibkarlıq

Azərbaycanın «Doing Business»də reytinqinin düşməsi metodologiyanın dəyişməsi ilə bağlıdır

03 dekabr 2010 11:32 (UTC +04:00)

Bunu «APA-Economics»ə açıqlamasında «Doing Business-2011» hesabatının müəlliflərindən olan Svetlana Baqautdinova bildirib.

S.Baqautdinova qeyd edib ki, əvvəlki illərdən fərqli olaraq bu il biznes mühitini araşdıranda 10 deyil, 9 göstəricidən istifadə edilib. Səbəbi isə göstəricilərdən birinin indi təkmilləşdirilməsi ilə bağlıdır: «Ona görə də indi biz deyə bilmərik ki, Azərbaycanda hansısa mənfi dəyişikliklər baş verib. Yəni, reytinqin dəyişməsi yalnız metodologiyanın dəyişməsi ilə bağlıdır».

Üstəlik, hesabat müəllifinin sözlərinə görə, bu il Azərbaycanda iki müsbət islahat qeydə alınıb. Bunlar kredit informasiyası sisteminin və vergi inzibatçılığının yaxşılaşması ilə bağlıdır. S.Baqautdinova bildirib ki, hazırda Azərbaycanda ən problemli məsələ tikintiyə icazələrin alınması ilə bağlıdır: «Azərbaycan bu göstəriciyə görə dünyada vəziyyətin ən pis olduğu 35 ölkə sırasındadır, eləcə də bu göstəriciyə görə regionda da ən aşağı yerlərdən birini tutur».

S.Baqautdinova hesab edir ki, bu sahədə vəziyyətin qaydaya salınması üçün bir sıra ciddi məsələlər həll olunmalıdır. Bunlar vahid Tikinti Məcəlləsinin yaradılması, tikinti ilə əlaqədar sahələri tənzimləyən qanunvericiliyin müasir reallığa uyğunlaşdırılması, Bakının ərazisinin zonalara bölünməsi ilə bağlı təfərrüatlı planın hazırlanmasıdır: «Yəni, əvvəlcədən bilinməlidir ki, şəhərin hansı ərazisində nəyi və necə tikmək olar».

Bundan başqa, ekspertin sözlərinə görə, ölkədə tikintiyə nəzarət üzrə müasir üsulların tətbiq edilməsi vacibdir. Bunlar özəl tikinti müfəttişləri və layihəçilərinin cəlb edilməsi və bu sahədəki dövlət funksiyalarının bir hissəsinin özəl sektora verilməsi yolu həll olunmalıdır.

S.Baqautdinova bildirib ki, Beynəlxalq Maliyyə Korporasiyası bu məsələnin Azərbaycanın dövlət qurumları ilə müzakirə edir: «Amma bu daha çox idarələrarası məsələdir və burada sürətli islahatların aparılması alınmayacaq. Çünki söhbət insanların sağlamlığı və təhlükəsizlik qaydalarına əməl olunmasından getdiyinə görə, burada islahatlar düşünülmüş və çox ehtiyatlı aparılmalıdır».