Sahibkarlıq

Ana səhifə

Sahibkarlıq

Azərbaycanda biznes mühitin yaxşılaşdırılması üçün yeniliklər təklif edilib

03 dekabr 2010 12:41 (UTC +04:00)

«APA-Economics»in məlumatına görə, müxtəlif dövlət qurumlarının nümaynədələrinin iştirak etdiyi tədbirdə biznesin qeydiyyatı, tikintiyə icazənin alınması, əmlakın qeydiyyatı, kredit alınması, investorların maraqlarının qorunması, beynəlxalq ticarət və vergilərin ödənilməsi sahəsindəki vəziyyət müzakirə edilib.

«Doing Business» hesabatının müəlliflərindən olan Svetlana Baqautdinova Azərbaycanda biznesin qeydiyyatı sisteminin qabaqcıl hesab olunduğunu deyib. Qeyd edək ki, hesabata əsasən, ölkədə biznesin açılması üçün 6 prosedur, 5 sənəd, 8 gün və 113 manat vəsait lazımdır.

Bununla yanaşı, hesabat müəllifləri qeydiyyatın daha da təkmilləşdirilməsi üçün bəzi yeniliklər də təklif edirlər. Belə ki, «Doing Business» hesabatının müəlliflərinin fikrincə, Azərbaycanda qeydiyyat zamanı müəssisənin hüquqi ünvanı və ərizəçinin imzasının notarial yolla təsdiqi barədə qanunvericilikdəki tələb aradan qaldırılmalı, «susmaq razılıqdır» prinsipi tətbiq edilməli (yəni, ərizəçi müəssisənin qeydiyyata alınıb-alınmadığı barədə cavab almadıqda bu müəssisənin qeydiyyata alınması kimi başa düşüləcək), məlumat bazasında qeydiyyatdan keçmiş müəssisələr barədə məlumatların həcmi artırılmalı, bura müəssisənin maliyyə hesabatları barədə məlumatdar da daxil edilməlidir.

BMK mütəxəssislərinin qeydiyyat sistemi ilə bağlı təklif etdiyi digər maraqlı yenilik qeydiyyat prosedurunun onlayn rejimdə, yəni internet vasitəsilə aparılmasıdır. S.Baqautdinovanın sözlərinə görə, xüsusilə fiziki şəxslər üçün əlverişli olacaq bu sistemin tətbiqinə ölkədə «elektron imza»nın işləməməsi mane olur. Bu sistem vasitəsilə, məsələn, xaricdə yaşayan insanlar da Azərbaycana gəlmədən burada müəssisə yarada bilərlər.

Ekspertin sözlərinə görə, Azərbaycanda müəssisələrin könüllü ləğv edilməsi proseduru da asanlaşdırılmalıdır: «Bu məsələ «Doing Business» hesabatının rəsmi indikatorlarından biri sayılmasa da, təcrübə göstərir ki, ləğvetmə proseduru asan olanda ölkədə daha çox şirkət yaradılır».

«Doing Business» hesabatının müəllifləri Azərbaycanda əmlakın qeydiyyatının da təkmil olduğunu bildirirlər – hesabata əsasən, Azərbaycan bu göstəriciyə görə dünyada 10-cu yerdədir: «Azərbaycanda əmlakın bir şirkətdən digərinə və ya bir şəxsdən digərinə verilməsi praktiki olaraq bir neçə gün çəkir və bu iş ciddi islahatların nəticəsidir».

BMK mütəxəssislərinin fikrincə, burada da növbəti addım əmlakın qeydiyyatının onlayn rejimdə aparılması ola bilər: «Belə olsa, insanlar mülkiyyət hüququnu otaqdan və ya ofisdən çıxmadan başqalarına verə biləcəklər».