Sahibkarlıq

Ana səhifə

Sahibkarlıq

Azərbaycanda özəlləşdirmə çeklərinin müddəti dekabrın 31-də başa çatır

09 dekabr 2010 08:59 (UTC +04:00)

Komitədən «APA-Economics»ə verilən məlumata görə, özəlləşdirmə payları ölkədə həyata keçirilən dövlət mülkiyyətinin özəlləşdirilrməsi prosesində sosial ədalət prinsipinin və vətəndaşların bütün təbəqələrinin bərabərhüquqlu iştirakının təmin edilməsi məqsədi ilə buraxılıb. Belə ki, 1996-cı ildən vətəndaşlara 31,9 mln. özəlləşdirmə çeki paylanılıb. Bu proses çərçivəsində Azərbaycanın 1997-ci il yanvar ayının 1-dək anadan olmuş bütün vətəndaşlarına 4 çekdən ibarət özəlləşdirmə payları verilib. İndiyədək özəlləşdirmə prosesi zamanı bu çeklərin 25,5 mln-a yaxını, yəni dövriyyəyə buraxılmış ümumi çeklərin təxminən 80%-i silinib.

Komitədən bildirilib ki, indiyədək Azərbaycan prezidentinin müvafiq fərmanları ilə çeklərin istifadə müddəti bir neçə dəfə - 2002-ci il yanvarın 1-nə, 2004-cü il iyulun 1-nə, 2008-ci il yanvarın 1-nə və nəhayət dövlət başçısının 23 dekabr 2009-cu il tarixli Fərmanı ilə 2010-cu ilin sonunadək uzadılıb. Yəni, dekabrın 31-də çeklərin istifadə müddəti başa çatır.

Komitənin məlumatına görə, Azərbaycanda özəlləşdirmə çeklərinin istifadə müddəti başa çatmasından sonrakı dövr üçün yeni özəlləşdirmə mexanizmləri artıq müəyyənləşdirilib. Azərbaycan prezidentinin «Azərbaycanda dövlət əmlakının özəlləşdirilməsi ilə bağlı Azərbaycan Respublikası Prezidentinin bəzi fərmanlarına əlavələr və dəyişikliklər edilməsi barədə» 2010-cu il 22 iyun tarixli fərmanına əsasən, yaradılan bu mexanizmlər özəlləşdirmə paylarının (çeklərin) müddəti başa çatandan sonra əhalinin özəlləşdirmədə iştirakını təmin edəcək. Bu dəyişikliklər həm səhmdar cəmiyyətlərinin səhmlərinin güzəştli satışı, pul və ixtisaslaşdırılmış çek hərracları, həm də kiçik müəssisələrin özəlləşdirilməsi prosesini əhatə edir.