Sahibkarlıq

Ana səhifə

Sahibkarlıq

“Qazaxıstan-Mangistau-Azərbaycan” adlı regional biznes-forum keçirilib

10 dekabr 2010 08:14 (UTC +04:00)

Bakı. Laçın Sultanova – APA. Qazaxıstanın Aktau şəhərində “Qazaxıstan-Mangistau-Azərbaycan” adlı regional biznes forum keçirilib. APA-nın Qazaxıstan mətbuatına istinadən verdiyi məlumata görə, biznes-forum çərçivəsində keçirilən sərgidə Azərbaycanın iqtisadi və sərmayə potensialı nümayiş olunub.
Tədbir çərçivəsində əməkdaşlıq haqqında bir sıra memorandumlar və niyyət protokolları imzalanıb. ARDNŞ-lə “Mangistaumunayqaz” Səhmdar Cəmiyyəti arasında imzalanmış Memorandum əsasında neft istehsalı sahəsində yeni texnologiyalardan istifadə olunması və neft tullantılarının emalı üzrə birgə müəssisələr yaradılacaq.
Qeyd edək ki, Mangistau vilayətində Qazaxıstan və Azərbaycan kapitalının iştirakı ilə 100-dən artıq birgə müəssisə fəaliyyət göstərir, onların əksəriyyəti neft-qaz sektoruna aid müəssisələrdir, ticarət və kənd təsərrüfatı sahəsində də iş aparılır.
Biznes-forumda Mangistau vilayətinin rəhbəri Krımbek Kuşerbayev, Azərbaycanın Qazaxıstandakı səfiri Zakir Həşimov, Qazaxıstanın Azərbaycandakı səfiri Serik Primbetov, Azərbaycanın Aktaudakı baş konsulu Rəşad Məmmədov, Azərbaycanda İxracın və İnvestisiyaların Təşviqi Fondunun sədr müavini Rüfət Məmmədov, Mangistau vilayətinin və Azərbaycanın iri şirkətlərinin nümayəndələri iştirak ediblər.