Sahibkarlıq

Ana səhifə

Sahibkarlıq

Mingəçevirdə «Regionlarda sahibkarlığın inkişafına dövlət dəstəyi» mövzusunda tədbir keçirilib

10 dekabr 2010 14:13 (UTC +04:00)

Bakı. Nicat Mustafayev – APA-Economics. Bu gün Azərbaycan İqtisadi İnkişaf Nazirliyinin Sahibkarlığa Kömək Milli Fondunun (SKMF) təşkilatçılığı ilə Mingəçevirdə «Regionlarda sahibkarlığın inkişafına dövlət dəstəyi» mövzusunda tədbir keçirilib. Nazirlikdən «APA-Economics»ə verilən məlumata görə, tədbirdə Mingəçevir şəhərində və ətraf rayonlarda fəaliyyət göstərən 140-a yaxın sahibkar iştirak edib.

Tədbirdə çıxış edən SKMF-in icraçı direktoru Şirzad Abdullayev Fondun fəaliyyəti və güzəştli kreditlər hesabına bölgələrdə həyata keçirilən layihələr barədə məlumat verib və bildirib ki, Fond 2010-cu ilin ötən dövründə 1 336 sahibkara 100,9 mln. manat güzəştli kredit verib. Bu kreditlər hesabına 5 003 yeni iş yerinin yaradılması nəzərdə tutulur. Verilmiş kreditlərin 99,8%-i rAzərbaycanın regionlarının payına düşür.

İqtisadi İnkişaf Nazirliyinin regionların inkişafı və dövlət proqramları şöbəsinin müdiri Sahib Məmmədov çıxışında bildirib ki, məqsədli dövlət proqramlarının uğurlu icrası nəticəsində regionlarda tarazlı sosial-iqtisadi inkişafa nail olunmuş, bölgələrin iqtisadi mənzərəsi dəyişib, iqtisadiyyatın bütün sahələri inkişaf edib, məşğulluğun artırılmasına nail olunub.

Öz növbəsində İqtisadi İnkişaf Nazirliyi Bakı Biznes Tədris Mərkəzinin şöbə müdiri Qorxmaz Əfəndiyev Mərkəzin fəaliyyəti barədə məlumat verib və qeyd edib ki, Bakı Biznes Tədris Mərkəzinin əsas fəaliyyət istiqamətləri ölkədə sahibkarların və sahibkarlıq fəaliyyətinə yeni başlamaq istəyənlərin maarifləndirilməsi, onlara informasiya və məsləhət xidmətlərinin göstərilməsi, regionlarda işgüzar fəallığın artırılıb.

Tədbirdə sahibkarlar üçün «Güzəştli kreditlərin verilməsi mexanizmi, investisiya layihələrinin hazırlanması və təqdim olunması» mövzusunda treninq keçirilib və metodiki materiallar paylanıb.

Tədbir çərçivəsində həmçinin, müvəkkil kredit təşkilatları vasitəsilə Mingəçevir şəhəri və ətraf rayonlarda fəaliyyət göstərən 44 sahibkarlıq subyektinə 554 min manat güzəştli kredit verilib ki, bu kreditlər hesabına 90-dan çox yeni iş yerinin yaradılması nəzərdə tutulur.