Sahibkarlıq

Ana səhifə

Sahibkarlıq

Bakıda “Azərbaycanda yaşıl iqtisadiyyatın və yaşıl biznesin perspektivləri” mövzusunda beynəlxalq seminar keçirilib

13 dekabr 2010 09:28 (UTC +04:00)

Bakı. Əli Əhmədov - APA-Economics. Bu gün Bakıda “Azərbaycanda yaşıl iqtisadiyyatın və yaşıl biznesin perspektivləri” mövzusunda beynəlxalq seminar keçirilib.

“APA-Economics”in xəbərinə görə, seminar Azərbaycan Türkiyə İş Adamları Birliyi (ATİB), ATİB-in birinci vitse-prezidenti olduğu Qara dəniz və Xəzər dənizi Sahibkarlar Konfederasiyaları Birliyinin (UBCCE) və Almaniya Texniki Əməkdaşlıq Cəmiyyətinin (GTZ) təşkilatçılığı və “CNİM” şirkətinin dəstəyi ilə baş tutub.

Tədbirin açılış mərasimində UBCCE-nin birinci vitse-prezidenti və ATİB-in fəxri sədri Ahmet Erentok, Sənaye və Energetika Nazirliyinin (SEN) Alternativ və Bərpa Olunan Enerji Mənbələri üzrə Dövlət Agentliyinin direktor müavini Cəmil Məlikov, ARDNŞ-in Ekoloji Layihələrin İdarəedilməsi Departamentinin direktoru Ramiz Əliyev və GTZ-in Ətraf Mühit və İqlim Dəyişikliyi Departamentinin Ətraf Mühit, Resurs Səmərəliliyi və Tullantıların İdarəedilməsi şöbəsinin rəhbəri Detlef Şrayber çıxış ediblər. Daha sonra seminar sessiyalarla davam etdirilib.

Qeyd edək ki, seminar UBCCE və GTZ təşkilatlarının ortaq olaraq həyata keçirdikləri “UBCCE ölkələrində Yaşıl Biznesi Dəstəkləmə Strategiyasının Formalaşdırılması” layihəsi çərçivəsində təşkil edilib. Layihəyə Almaniya Ətraf Mühit Nazirliyi tərəfindən də dəstək verilir. Layihənin əsas məqsədi iqlim dəyişikliyinin ortaya çıxarıldığı çağırışlara və imkanlara özəl sektor tərəfindən çevik və səmərəli cavab verilməsi üçün ümumi biznes strategiyasının formalaşdırılmasıdır. Strategiya çərçivəsində özəl sektora və digər maraqlı tərəflərə idarəetmə məsələləri, biznes imkanları, texnologiyaları transferi və əməkdaşlıq barədə lazımi informasiya təqdim ediləcək. Layihənin əsas fokusu iqlimə uyğun texnologiyalar, enerji və resurslardan səmərəli istifadə məsələləridir.

Azərbaycan Türkiyə İş Adamları Birliyi (ATİB) 27 noyabr 2006-cı ildə təsis edilən və hazırda 19 ölkədən 24 üzvü olan Qara Dəniz və Xəzər dənizi İş Adamları Konfederasiyaları Birliyinin (UBCCE) birinci vitse-prezidentidir.