Sahibkarlıq

Ana səhifə

Sahibkarlıq

Siyəzəndə “Regionlarda sahibkarlığın inkişafına dövlət dəstəyi” mövzusunda tədbir keçirilib

14 dekabr 2010 12:40 (UTC +04:00)

Bakı - APA-Economics. İqtisadi İnkişaf Nazirliyinin (İİN) Sahibkarlığa Kömək Milli Fondu (SKMF) “Regionlarda sahibkarlığın inkişafına dövlət dəstəyi” mövzusunda növbəti tədbiri dekabrın 14-də Siyəzən rayonunda keçirib.

İİN-dən “APA-Economics”ə verilən xəbərə görə, Siyəzən və ətraf rayonlarda fəaliyyət göstərən 200-dək sahibkarın iştirak etdiyi tədbirin keçirilməsində məqsəd sahibkarlığın inkişafına dövlət dəstəyi, onların investisiya layihələrinin güzəştli şərtlərlə kreditləşdirilməsi və sahibkarların maarifləndirilməsidir.

Tədbir iştirakçıları əvvəlcə SKMF-dan güzəştli kredit almış Siyəzən rayonundakı “Siyəzən Aqro” ASC-nin istixana kompleksinin və “Siyəzən Şərab” ASC-nin fəaliyyəti ilə tanış olublar. Sonra Siyəzən rayonunda “Regionlarda sahibkarlığın inkişafına dövlət dəstəyi” tədbiri öz işinə başlayıb.

Tədbiri giriş sözü ilə açan Siyəzən rayon İcra Hakimiyyətinin başçısı Əflatun Rufiyev bildirib ki, ölkə rəhbərliyi tərəfindən regionların inkişafına böyük diqqət və qayğı göstərilir, bu istiqamətdə həyata keçirilən dövlət proqramlarının uğurlu icrası nəticəsində regionlarda davamlı inkişaf təmin edilir, sosial infrastruktur yenidən qurulur, sahibkarlıq fəaliyyəti daha da genişlənir. Qeyd olunub ki, ölkəmizin digər şəhər və rayonlarında olduğu kimi, Siyəzəndə də yeni istehsal və xidmət müəssisələri, sosial infrastruktur obyektləri yaradılıb, yeni iş yerləri açılıb. Hazırda bu sahədə işlər davam etdirilir.

SKMF-in icraçı direktoru Şirzad Abdullayev Fondun fəaliyyəti və güzəştli kreditlər hesabına bölgələrdə həyata keçirilən layihələr barədə məlumat verərək bildirib ki, Fond 2010-cu ilin ötən dövründə 1345 sahibkara 102,4 mln. manat güzəştli kredit verib. Bu kreditlər hesabına 5070 yeni iş yerinin yaradılması nəzərdə tutulur. Verilmiş kreditlərin 99,8%-i respublikanın regionlarının payına düşür. Hazırda Sahibkarlığa Kömək Milli Fondunun iqtisadiyyatın müxtəlif sahələri üzrə investisiya layihələrinin maliyyələşdirilməsini davam etdirdiyini qeyd edən Şirzad Abdullayev sahibkarları SKMF ilə fəal əməkdaşlığa dəvət edib.

İİN-in Regionların inkişafı və dövlət proqramları şöbəsinin baş məsləhətçisi İdris Alışov çıxışında Azərbaycan prezidenti İlham Əliyevin rəhbərliyi ilə həyata keçirilən iqtisadi siyasətin prioritetlərindən birinə çevrilmiş regionların sosial-iqtisadi inkişafının sürətlə davam etdirildiyini vurğulayıb.

İİN-in Bakı Biznes Tədris Mərkəzinin şöbə müdiri Vidadi Baxışov sahibkarların maarifləndirilməsinin əhəmiyyətini qeyd edərək bu istiqamətdə Mərkəzin fəaliyyəti barədə məlumat verərək bildirib ki, 2010-cu il ərzində Mərkəz tərəfindən respublikanın müxtəlif rayonlarında keçirilmiş 100-dən çox təlim kursunda 5 mindən çox sahibkar iştirak etmişdir.

Tədbirdə sahibkarlar üçün “Güzəştli kreditlərin verilməsi mexanizmi, investisiya layihələrinin hazırlanması və təqdim olunması” mövzusunda treninq keçirilmiş, sahibkarlara metodiki materiallar paylanıb.

Tədbir çərçivəsində həmçinin müvəkkil kredit təşkilatları vasitəsilə Siyəzən və ətraf rayonlarda fəaliyyət göstərən 23 sahibkarlıq subyektinə 235 min manat güzəştli kredit verilib. Bu kreditlər hesabına 40-dan çox yeni iş yerinin yaradılması nəzərdə tutulur.