Sahibkarlıq

Ana səhifə

Sahibkarlıq

Azərbaycan sahibkarlarına ikiqat ucuz qiymətə keyfiyyətli texnika təklif olunacaq

20 dekabr 2010 14:42 (UTC +04:00)

Bakı. Əli Əhmədov – APA-Economics. Azərbaycan Sahibkarlar Konfederasiyası (ASK) yerli sahibkarlara Almaniyada istifadə olunmuş maşın və avadanlıqlar sərgisinin keçiriləcəyi barədə məlumat yayıb. ASK-dan «APA-Economics»ə verilən məlumata görə, 2011-ci il aprel ayının 6-8-də Köln şəhərində istifadə olunmuş maşın qurğuları və avadanlıqlar üzrə «USETEC-2011» beynəlxalq sərgisi keçiirləcək.

İndiyədək «Resale» adı ilə məşhurlaşmış sərginin davamı olan USETEC, dünyada istifadə olunmuş maşın və avadanlıqların ən böyük ticarət yarmarkası sayılır. Gələn ildən etibarən bu yarmarka hər il Kölndə keçiriləcək. Yarmarkada bütün sahələri əhatə edəcək işlənmiş texnika və avadanlıqlar nümayiş olunacaq.

ASK-dan «APA-Economics»ə bildiriblər ki, bu sərgidə hər növ texnika - yük, minik avtomobilləri, istənilən kənd təsərrüfatı texnikası, qurğu və avadanlıqlar, hətta hazır zavod, istehsal xətti və ya kompleksi almaq olar.

Nümayiş etdirilən texnika və avadanlıq işlənmiş olsa da, bundan sonrakı istifadəyə tam yararlı olur və onun satıcısı texnikanın keyfiyyətinə zəmanət verir. Yəni, bu texnika Azərbaycanda istifadə olunduğu zaman hansısa problem yaransa, satıcı ölkəyə gəlib ona texniki xidmət göstərəcək. Apreldə keçiriləcək sərgidə qiymətlərin necə olacağı indidən bilinməsə də konfederasiyadan bildiriblər ki, adətən belə sərgilərdə qiymətlər yeni analoqlarından azı 20%, bəzən isə 2 dəfə ucuz olur.

ASK-dan bildirilib ki, «USETEC-2011» sərgisi haqqında ətraflı məlumat əldə etmək istəyənlər ASK-ya müraciət edə bilər, təşkilatın üzvləri sərgidə güzəştli şərtlərlə iştirak edə biləcəklər. Belə ki, sərgidə iştirak etmək üçün 1300 manat ödəmək kifayətdir. Bura nəqliyyat, otel və bütün digər xərclər daxildir.