Sahibkarlıq

Ana səhifə

Sahibkarlıq

Xızıda «Regionlarda sahibkarlığın inkişafına dövlət dəstəyi» mövzusunda tədbir keçirilib

21 dekabr 2010 12:32 (UTC +04:00)

Bakı. Nicat Mustafayev - APA-Economics. Bu gün Xızıda Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) «Regionlarda sahibkarlığın inkişafına dövlət dəstəyi» mövzusunda tədbir keçirib.

Nazirlikdən «APA-Economics»ə verilən məlumata görə, tədbirdə Xızı və ətraf rayonlarda fəaliyyət göstərən 60-a yaxın sahibkar iştirak edib.

Tədbirdə çıxış edən SKMF-ın icraçı direktoru Şirzad Abdullayev Fondun fəaliyyəti və güzəştli kreditlər hesabına bölgələrdə həyata keçirilən layihələr barədə məlumat verib və qeyd edib ki, Fond iqtisadiyyatın prioritet sahələrinin inkişafı üzrə investisiya layihələrinin maliyyələşdirilməsi məqsədilə sahibkarlıq subyektlərindən təkliflərin qəbulunu, həmçinin, müasir standartlara cavab verən, ixracyönümlü və rəqabət qabiliyyətli istehsal və emal müəssisəsinin yaradılması və ya müasir texnologiyaların tətbiqi ilə yenidən qurulması üzrə investisiya layihələrinin qəbulunu növbəti ildə də davam etdirəcək. Ş.Abdullayev hazırda Fondun iqtisadiyyatın müxtəlif sahələri üzrə investisiya layihələrinin maliyyələşdirilməsinin davam etdirildiyini bildirib, sahibkarları fəal əməkdaşlığa dəvət edib.

Tədbirdə sahibkarlar üçün «Güzəştli kreditlərin verilməsi mexanizmi, investisiya layihələrinin hazırlanması və təqdim olunması» mövzusunda treninq keçirilib, sahibkarlara metodiki materiallar paylanıb.

Tədbir çərçivəsində həmçinin müvəkkil kredit təşkilatları vasitəsilə Xızı və ətraf rayonlarda fəaliyyət göstərən 12 sahibkarlıq subyektinə 165 min manat güzəştli kredit verilib ki, bu kreditlər hesabına 30-a yaxın yeni iş yerinin yaradılması nəzərdə tutulur.