Sahibkarlıq

Ana səhifə

Sahibkarlıq

MDB dövlətləri arasında keçirilən keyfiyyət müsabiqəsində Azərbaycanı iki şirkət təmsil edəcək

24 dekabr 2010 11:34 (UTC +04:00)

Bakı - APA-Economics. MDB-yə üzv olan dövlətlər arasında keyfiyyət sahəsində keçirilən müsabiqənin II mərhələsində Azərbaycanı təmsil edəcək şirkətlərin adı açıqlanıb.

“APA-Economics”in xəbərinə görə, Azərbaycanda keyfiyyət sahəsində (istehsal və göstərilən xidmətlər üzrə) əldə edilən nailiyyətlərə görə mükafatların müəyyən edilməsi üzrə ekspert komissiyasının rəylərini nəzərə alan münsiflər heyətinin qərarına əsasən, “Gilan Qəbələ Konserv Zavodu” MMC və “Göyçay-Süd” ASC MDB-yə üzv olan dövlətlər arasında keyfiyyət sahəsində keçirilən müsabiqənin II mərhələsində iştirak etmək hüququ qazanıb.

Münsiflər heyətinin digər qərarı ilə işçilərinin sayı 250 nəfərdən çox olan təşkilatlar arasında keçirilən müsabiqədə “Gilan Qəbələ Konserv Zavodu” MMC laureat adına, işçilərin sayı 250 nəfərə qədər olan təşkilatlar arasında keçirilən müsabiqədə “Göyçay-Süd” ASC laureatı adına, işçilərin sayı 250 nəfərə qədər olan təşkilatlar arasında keçirilən müsabiqədə “Nur Süd” MMC diplomant adına, işçilərin sayı 250 nəfərə qədər olan təşkilatlar arasında keçirilən müsabiqədə “Pal Food” MMC diplomant adına, işçilərin sayı 250 nəfər qədər olan təşkilatlar arasında keçirilən müsabiqədə “Masazır Duz Zavodu” QSC diplomant adına layiq görülüb.

Qeyd edək ki, müsabiqənin keçirilməsi haqqında qərar 25 noyabr 2005-ci il tarixində MDB hökumət başçıları şurası tərəfindən təsdiq edilib. MDB ölkələri arasında keyfiyyət sahəsində əldə edilən nailiyyətlərə görə mükafatların müəyyən edilməsi məqsədilə müsabiqə 2 mərhələdə keçirilir. Müsabiqənin I mərhələsi MDB-yə üzv dövlətlərin milli orqanları tərəfindən aparılır. I mərhələnin qaliblərinin II mərhələdə iştirakı üçün qaliblər haqqında məlumatlar və sənədlər toplusu Dövlət Komitəsi tərəfindən Dövlətlərarası Şuraya təqdim ediləcək. Müsabiqə 2 ildə bir dəfə keçirilir. Müsabiqədə iştirak etmək üçün şərtlər Azərbaycanda keçirilmiş seçimdə (Milli orqan tərəfindən elan edilmiş müsabiqədə) iştirak, iki il müddətindən az olmamaq şərti ilə istehsal edilən məhsulun (göstərilən xidmətin) yüksək keyfiyyətliliyin təsdiqi, istehsal edilən məhsulun (göstərilən xidmətlərin) ikidən az olmamaq şərti ilə MDB üzv dövlətlərinə ixrac edilməsi (və ya xidmətlərin göstərilməsi).

Müsabiqənin II mərhələsi Dövlətlərarası Şura tərəfindən keçiriləcək. 2011-ci ilin dekabrın ayında MDB üzv dövlətləri arasında qaliblər müəyyən ediləcək.