Sahibkarlıq

Ana səhifə

Sahibkarlıq

Azərbaycanda idman mərc oyunlarının təşkilatçıları vergini yeni qayda ilə ödəyəcək

30 dekabr 2010 12:38 (UTC +04:00)

«APA-Economics»in məlumatına görə, Nazirlər Kabinetinin «Vergi ödəyicisinin mənfəəti birbaşa müəyyən etmək mümkün olmadığı hallarda mənfəətin hesablanması Qaydalarının təsdiq edilməsi barədə» qərara etdiyi dəyişiklik nəticəsində idman mərc oyunlarını həyata keçirən vergi ödəyicisinin (operator) və bu oyunların keçirilməsində vasitəçi olan agentin (satıcı) mənfəətinin (gəlirinin) müəyyən edilməsi və mənfəətdən (gəlirdən) verginin tutulması ayrıca qayda ilə həyata keçiirləcək.

Beləliklə, idman mərc oyunları mənfəətin müəyyən olunması çətin sahə sayıldığı üçün bu fəaliyyəti həyata keçirən vergi ödəyicisinin mənfəəti şərti olaraq onun gəlirlərinin (oyun iştirakçılarından qəbul edilmiş pul vəsaitlərinin) 30%-i miqdarında qəbul edilir. Başqa sözlə, təşkilatçının yığdığı vəsaitlərin ümumi məbləğinin 30%-nin onun mənfəəti olduğu qəbul edilib. Mənfəət vergisinin 20% təşkil etdiyini də nəzərə alanda, mərc oyunları təşkilatçısı iştirakçılardan yığdığı pulların 6%-ni vergi kimi ödəməli olacaq.

Mərc oyunlarında vasitəçi agent, yəni satıcı kimi iştirak edənlər bundan az vergi ödəyəcəklər. Qaydalara edilən dəyişikliyə əsasən, satıcıların mənfəəti daxil olan vəsaitin 20%-i qədər qəbul edilir, mənfəət vergisinin dərəcəsini də nəzərə alanda, mərc oyunları üzrə agentlər yığdıqları pulun 4%-ni vergi kimi ödəməli olacaqlar.

Qərara əsasən, idman mərc oyunları nəticəsində udulan məbləğ vergidən azad edilib.

Qərarda deyilir ki, Vergi Məcəlləsinin 102.1.13-cü maddəsinə əsasən, Qiymətli Kağızlar üzrə Dövlət Komitəsində qeydiyyatdan keçmiş lotereyalardan əldə olunan uduşlar gəlir vergisindən azaddır. İdman mərc oyunlarının təşkilinə və keçirilməsinə nəzarəti də QKDK həyata keçirdiyindən, lotereya uduşlarında nəzərdə tutulan azadolma idman mərc oyunlarından əldə edilən uduşlara da şamil edilir.