Sahibkarlıq

Ana səhifə

Sahibkarlıq

Gürcüstanda mikrobizneslə məşğul olanlar vergidən tamamilə azad edilib

07 yanvar 2011 08:15 (UTC +04:00)

Bakı. Əli Əhmədov - APA-Economics. Bu ildən etibarən Gürcüstanda biznesin bəzi növləri vergidən tamamilə azad edilir.

“APA-Economics”in “Business-Georgia” qəzetinə istinadən xəbərinə görə, bundan sonra mikrobizneslə məşğul olanlar gəlir vergisi ödəməyəcəklər. Hökumət mikrobiznes sayılacaq sahələri artıq müəyyənləşdirib.

Qərara əsasən, əgər şəxs muzdlu əməkdən istifadə etmirsə, paltar istehsalı, o cümlədən üst və alt paltarlarının, puloverlərin istehsalı, xalça istehsalı, traktor və kombaynlar vasitəsilə kənd təsərrüfatı məhsullarının istehsalı vergidən azad edilib.

Bundan başqa, baş geyimləri, digər geyim əşyaları və aksesuarlarının, ağacdan müxtəlif məmulatların - ev və mətbəx əşyalarının, çini və keramika məmulatlarının istehsalı da mikrobiznes sayılaraq vergidən azad edilib. Güzəştlər musiqi alətlərinin - akkordeon və qarmonların, nəfəs alətlərinin, süpürgə və fırçaların istehsalına da tətbiq ediləcək.

Bu qərarla məişət və şəxsi əşyaların, ayaqqabı və dəri məmulatlarının, saat və zərgərlik məmulatlarının təmiri, geyim əşyalarının təmiri də vergidən azaddır - bir şərtlə ki, bu fəaliyyət həmin əşyaların istehsalı və ticarətindən kənarda aparılsın. Bundan başqa, camaşır (paltaryuyan) və ev təsərrüfatının aparılması xidməti göstərənlər də gəlir vergisi ödəməyəcəklər. Bununla yanaşı, bu sahədə çalışanlar mikrobiznesə aid edilib vergidən azad olunmaları üçün bu işlə şəxsən, muzdlu əmək olmadan məşğul olmalıdırlar.

Qeyd edək ki, “mikrobiznes” anlayışı Gürcüstan Vergi Məcəlləsinə yeni daxil edilib. Məcəllədə bu ildən qüvvəyə minən dəyişikliyə əsasən “mikrobiznes” və “kiçik biznes” anlayışları fərqləndirilib. Gürcüstanda kiçik biznes illik dövriyyəsi 100 min larini (55 min dollar) keçməyən biznes sayılır. Mikrobiznes anlayışında isə illik dövriyyə ilə bağlı tələb qoyulmayıb - gəlirlərindən və qazancından asılı olmayaraq, yuxarıda sadalanan fəaliyyətlə göstərilən şərtlər daxilində məşğul olanlar mikrobihznes sayılaraq vergidən azad ediləcəklər.

Məcəlləyə edilən digər dəyişikliyə görə, gürcü biznesmenləri ƏDV-ni aylıq yox, rüblük ödəyəcəklər. Gürcüstanın maliyyə naziri Kaxa Bainduraşvili bildirib ki, yeni Vergi Məcəlləsi “yumşaq qanun”dur və məcəllənin əvvəlki - “sərt variantından” xeyli fərqlənir.