Sahibkarlıq

Ana səhifə

Sahibkarlıq

Sahibkarlığa Kömək Milli Fondunun ayırdığı güzəştli kreditlər hesabına Gədəbəydə 100 yeni iş yeri yaradılacaq

10 yanvar 2011 13:49 (UTC +04:00)

Bakı. Nicat Mustafayev - APA-Economics. Gədəbəy rayonunda Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) tərəfindən ayrılmış güzəştli kreditlər hesabına investisiya layihələri həyata keçirilir.

Nazirlikdən «APA-Economics»ə verilən məlumata görə, Gədəbəy rayonunda kartof saxlanması üçün ümumi tutumu 10 min ton olan soyuducu anbar kompleksinin yaradılması, gündəlik 10 ton süd və 10 ton kartof emalı sahəsinin yaradılması məqsədilə dəyəri 4,1 mln. manat, illik istehsal gücü 12,8 mln. litr olan, müasir tələblərə cavab verən mineral su və limonad istehsalını nəzərdə tutan dəyəri 2,8 mln. manat olan 2 investisiya layihəsinə ötən il Fond tərəfindən 4,7 mln. manat güzəştli kredit verilib.

Bu layihələrin reallaşdırılması Gədəbəy rayonunda 100-ə yaxın yeni iş yerinin yaradılmasına imkan verəcək.

Həyata keçiriləcək layihələr Gədəbəy rayonunun sosial-iqtisadi inkişafına təkan verməklə yanaşı, ölkədə kartofçuluğun inkişafında, əhalinin keyfiyyətli yerli ərzaq məhsulları ilə təmin edilməsində əhəmiyyətli olacaq.

Qeyd edək ki, ötən il ərzində SKMF tərəfindən sahibkarlara 115 mln. manat məbləğində güzəştli kreditlər verib. Bu il isə bu rəqəm 125 mln. manat təşkil edəcək.