Sahibkarlıq

Ana səhifə

Sahibkarlıq

BP və tərəfdaşları Azərbaycanda icma inkişafı sahəsində yeni layihələrə başlayıblar

13 yanvar 2011 10:50 (UTC +04:00)

Bakı. Əli Əhmədov - APA-Economics. BP neft şirkəti və onun «Azəri-Çıraq-Günəşli» (AÇG), Bakı-Tbilisi-Ceyhan (BTC), «Şahdəniz» (ŞD) və Cənubi Qafqaz Boru Kəməri (CQBK) layihələrindəki tərəfdaşları Azərbaycanda icma inkişafına dəstək məqsədilə bu yaxınlarda üç yeni icma layihəsinə başlayıb. Bu dəstək bacarıq və səriştələr yaradılması üzrə gücləndirilmiş proqramlar vasitəsilə həyata keçiriləcək.

BP-nin Bakı ofisindən «APA-Economics»ə verilən məlumata görə, yeni təşəbbüslərə Gənclər üçün iqtisadi sahədə bacarıqların yaradılması Layihəsi, Keyfiyyəti yaxşılaşdırılmış və innovativ məktəbəqədər proqramlardan istifadə imkanı yaratmaqla uşaqlı ailələrə kömək Layihəsi, Gənclərə imkanlar yaradan sahibkarlıq mərkəzinin (GİYSM) yaradılması Layihəsi daxildir.

«Gənclər üçün iqtisadi sahədə bacarıqların yaradılması Layihəsi»nin məqsədi ilk növbədə gənc sahibkarlara davamlı və bazarın tələbinə uyğun həll üsulları, məsələn usta yanında uğurlu şagirdlik metodikası vasitəsilə öz bacarıqlarını gücləndirmək, gəlirlərini artırmaq və gənclərin sosial rifahını yüksəltmək səylərinə dəstək verməkdən ibarətdir. Layihə Azərbaycanın beş qərb rayonunda – Goranboy, Samux, Şəmkir, Tovuz və Ağstafa rayonlarında BTC/CQBK boyunca yerləşən 30 icmanı və Bakının Qaradağ rayonunda üç icmanı – Ümid, Sahil və Səngəçal icmalarını əhatə edir.

BP və onun tərəfdaşlarının layihəyə ayırdığı məbləğ 500 min dollar təşkil edir. Layihəni həyata keçirən «Ümid» yerli QHT əlavə 133,5 min dollar təmin edəcək. Layihənin həyata keçirilməsinə 2010-cu ilin noyabr ayında başlanıb və işlər 2012-ci ilin aprel ayınadək davam edəcək.

«Keyfiyyəti yaxşılaşdırılmış və innovativ məktəbəqədər proqramlardan istifadə imkanı yaratmaqla uşaqlı ailələrə kömək Layihəsi»nin məqsədi uşaq bağçaları üçün məktəbəqədər proqramların keyfiyyətini yaxşılaşdırmaq və icma əsaslı innovativ alternativlər vasitəsilə uşaqların təkmilləşdirilmiş məktəbəqədər təlimdən istifadə imkanlarını artırmaqdan ibarətdir. BTC və CQBK boyunca yerləşən Şəmkir, Tovuz və Samux rayonlarındakı beş icmanı əhatə edən layihə yerli «Tədrisdə İnnovasiyalar Mərkəzi» QHT tərəfindən həyata keçirilir. Layihənin həyata keçirilməsinə 2010-cu ilin noyabr ayında başlanıb və işlər 2011-ci ilin noyabr ayınadək davam edəcək. Layihənin dəyəri 101,5 min dollardır.

Gənclərə imkanlar yaradan sahibkarlıq mərkəzi (GİYSM) Gəncə peşə təlimi mərkəzi daxilində ayrıca biznes və idarəetmə bölümü kimi fəaliyyət göstərəcək və mərkəzin gənc sahibkarlara kömək səylərini gücləndirəcək. Layihə BTC və CQBK boyunca yerləşən Goranboy, Yevlax, Şəmkir, Ağstafa, Samux və Tövuz rayonlarında seçilmiş icmaları əhatə edir.

Həyata keçirilməsinə 2010-cu ilin noyabr ayında başlanmış və 2012-ci ilin may ayınadək (18 ay) davam edəcək bu layihənin dəyəri 99 min dollardır və yerli «Azərbaycan İcma İnkişafı üzrə Tədqiqat, Təlim və Resurs Mərkəzi» QHT tərəfindən həyata keçirilir.