Sahibkarlıq

Ana səhifə

Sahibkarlıq

Azərbaycan Əmlak Məsələləri Dövlət Komitəsində kollegiya iclası keçirilib

25 yanvar 2011 13:25 (UTC +04:00)

Bakı - APA-Economics. Azərbaycan Əmlak Məsələləri Dövlət Komitəsində (ƏMDK) 2010-cu ilin yekunları və qarşıda duran vəzifələrə həsr olunmuş geniş kollegiya iclası keçirilib.

Komitədən “APA-Economics”ə verilən məlumata görə, kollegiya iclasını giriş sözü ilə açan ƏMDK sədri Kərəm Həsənov qeyd edib ki, 2010-cu ildə respublika üzrə 95000-ə yaxın daşınmaz əmlak obyekti üzərində mülkiyyət hüquqları qeydiyyata alınıb.

Hesabat dövründə 20 000-dən çox ipoteka müqaviləsi, 550-yə yaxın yüklülük (icarə, istifadə) dövlət qeydiyyatına alınıb, 80 000-dən çox daşınmaz əmlakın texniki inventarlaşdırılması aparılaraq texniki pasport tərtib edilib. Hüquqi və fiziki şəxslərə dövlət reyestrindən 65000-ə yaxın məhdudiyyət arayışı, əhaliyə xidmətlə bağlı 30000-dən çox digər müxtəlif məzmunlu arayışlar verilib. Daşınmaz əmlakın vahid kadastrının aparılması, ünvan reyestri və daşınmaz əmlak obyektlərinə ünvan verilməsi sahələrində müəyyən edilmiş tədbirlər həyata keçirilib.

2010-cu ildə fəaliyyət proseslərində yol verdikləri nöqsanlara görə 2010-cu il ərzində 40-a yaxın komitə əməkdaşına müxtəlif intizam tənbeh tədbirləri görülüb, 4 nəfər işdən azad edilib.

İclasda komitə sədri 2011-ci ildə özəlləşdirmənin daha da sürətləndirilməsi, dövlət əmlakının özəlləşdirilməsi və icarəsindən daxilolmaların artırılması, dövlət əmlakının idarə edilməsinin təkmilləşdirilməsi, onun qorunub saxlanılması və səmərəli istifadə edilməsi sahəsində həyata keçiriləcək tədbirlərin daha da gücləndirilməsi, dövlət mülkiyyətində olan torpaq sahələrində qeyri-qanuni tikinti, yenidənqurma və quraşdırma işlərinin aparılmasının, onların istifadə təyinatının dəyişdirilməsi hallarının qarşısının alınması və səmərəli istifadəsinin təmin olunması istiqamətində görülmüş işlərin gələcəkdə də uğurla aparılmasının vacibliyini vurğulayıb.

İclasda qeyd olunub ki, daxil olmuş vətəndaş müraciətlərinin təhlilləri göstərir ki, bir çox hallarda daşınmaz əmlakın qeydiyyatı ilə bağlı vətəndaşlar tərəfindən tam olmayan və əsassız sənədlər təqdim olunur. Qanunvericilin tələblərinə uyğun olaraq bu kimi sənədlərin qəbul edilməməsi və ya qeydiyyatdan imtina edilməsi nəticəsində komitənin qurumlarının fəaliyyətindən müvafiq dövlət orqanlarına və müxtəlif instansiyalara haqsız vətəndaş şikayətləri edilir: “Bu kimi hallar diqqətdə saxlanılmalı və icra zamanı izah olunmalıdır”.

Bununla yanaşı, komitə sədri Kərəm Həsənov daşınmaz əmlaka dair hüquqların qeydiyyatı ilə bağı vətəndaşlara göstərilən xidmətin keyfiyyətinin və qanunçuluğun daha da gücləndirilməsi, sənədlərin siyahısının azaldılması və hüquqların qeydiyyatı ilə bağlı vətəndaşların müraciətlərinin baxılmasında operativliyin daha da artırılmasının zəruriliyini qeyd edib. Sənədlərin baxılmasında əlavə vaxt itkisinin və vətəndaşların süründürməçilik hallarının yolverilməzliyi, vətəndaş hüquqlarının təmin edilməsi istiqamətində də bir sıra tapşırıqlar verilib, bu sahədə nöqsan hallarına yol vermiş işçilər barəsində ciddi tədbirlərin görüləcəyi qeyd edilib.