Sahibkarlıq

Ana səhifə

Sahibkarlıq

Ötən il Azərbaycanda güzəştli kreditlər əsasında 56 yeni müəssisə istifadəyə verilib

25 yanvar 2011 14:17 (UTC +04:00)

Bakı. Nicat Mustafayev – APA-Economics. Ötən il ərzində Azərbaycanda sahibkarlara güzəştli kreditlərin verilməsi nəticəsində ölkənin bir çox regionunda müxtəlif istehsalat təyinatlı 56 yeni müəssisə istifadəyə verilib. «APA-Economics»in məlumatına görə, bu barədə Azərbaycanın iqtisadi inkişaf naziri Şahin Mustafayev bildirib.

Ş.Mustafayevin sözlərinə görə, 2010-cu ildə Nazirliyin Sahibkarlığa Kömək Milli Fondu (SKMF) tərəfindən 1 430 investisiya layihəsinin maliyyələşdirilməsinə 115 mln. manat həcmində güzəştli kreditlər ayrılıb ki, layihələrin təqribən 100%-i regionların payına düşür: «Bu il isə investisiya layihələrinin maliyyələşdirilməsinə SKMF tərəfindən 125 mln. manat güzəştli kreditlərin ayrılması nəzərdə tutulub».

Nazir həmçinin bildirib ki, Fond tərəfindən maliyyələşdirilən və müasir texnologiyaların tətbiqinə əsaslanan 112 layihənin icrasına artıq başlanılıb. Belə ki, ölkədə 25 soyuducu anbar kompleksi (15-i istifadəyə verilib), 17 taxıl anbarı (13-ü istifadəyə verilib), istehsal gücü 60 mln. ədəd damazlıq, 17 mln. ədəd əmtəəlik yumurta və 16 min ton quş əti olan 12 müəssisə (3-ü istifadəyə verilib), 5 südlük istiqamətli cins iribuynuzlu heyvandarlıq kompleksi (1-i istifadəyə verilib), 9 istixana kompleksi (2-i istifadəyə verilib), 3 süd emalı müəssisi(2-i istifadəyə verilib), 6 konserv zavodu (4-ü istifadəyə verilib), 2 tara istehsalı müəssisəsi (1-i istifadəyə verilib) və 8 tikinti materialları istehsalı obyektlərinin (4-ü istifadəyə verilib) inşası ilə bağlı işlər aparılır.

Ş.Mustafayev onu da qeyd edib ki, SKMF-in güzəştli kreditləri hesabına ölkədə 5 610 yeni iş yeri yaradılacaq.