Sahibkarlıq

Ana səhifə

Sahibkarlıq

Dövlət Əmək Müfəttişliyi regionlarda işçilərin icbari sığortalanması ilə bağlı yoxlamalara başlayır

02 fevral 2011 13:18 (UTC +04:00)

Bakı. Elnur Hüseynquluyev - APA-Economics. Bu il fevralın 1-dən Azərbaycan Əmək və Əhalinin Sosial Müdafiəsi Nazirliyinin Dövlət Əmək Müfəttişliyi rayonlarda yerləşən müəssisə və təşkilatlarda işçilərin icbari sığortalanması üzrə yoxlamalara başlayır.

“APA-Economics”in xəbərinə görə, bunu Dövlət Əmək Müfəttişliyinin rəis müavini Məhərrəm Məhərov bildirib.

Onun sözlərinə görə, “İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında” qanuna əsasən keçiriləcək bu yoxlamalar işçilərin icbari sığortalanması üzrə müəssisə rəhbərlərini məlumatlandırma və maarifləndirmə xarakteri daşıyır: “Fevral ayı ərzində öz işçisini bu sığorta növü üzrə sığortalamayan müəssisə və təşkilatlara hələlik cərimə tətbiq olunmayacaq. Çünki elə müəssisə və təşkilatlar var ki, bu qanunla bağlı ətraflı məlumatlandırılmayıb”.

M.Məhərov qeyd edib ki, bununla bağlı Maliyyə Nazirliyinin Dövlət Sığorta Nəzarəti Xidməti Azərbaycan Sığortaçılar Assosiasiyası ilə birlikdə icbari sığortanı təbliğ edən broşüralar, kitabçalar çap edərək bütün müəssisə və təşkilatlara paylamalıdırlar: “Ümumiyyətlə, bu sahədə əhalini maarifləndirmə işinə ciddi fikir verilməlidir”.