Sahibkarlıq

Ana səhifə

Sahibkarlıq

Azərbaycanda bəzi lisenziyaların verilməsi ictimai təşkilatlara həvalə oluna bilər

04 fevral 2011 10:00 (UTC +04:00)

Bakı. Əli Əhmədov – APA-Economics. Azərbaycanda sahibkarlığın inkişaf etdirilməsi məqsədilə hazırlanacaq təkliflərdə xüsusi razılıq - lisenziyalaşdırma sisteminin təkmilləşdirilməsinə də toxunulacaq. «APA-Economics»in məlumatına görə, bunu Azərbaycan Sahibkarlar Konfederasiyasının (ASK) prezidenti Məmməd Musayev bildirib.

M.Musayevin sözlərinə görə, konfederasiya bu məsələni ekspertlərlə təhlil edəcək və konkret təklif olarsa, bu barədə müvafiq qurumlar qarşısında məsələ qaldırılacaq: «Bu sahədə qonşu Türkiyə, Rusiya, inkişaf etmiş Avropa ölkələrinin təcrübəsindən də istifadə edəcəyik».

ASK başçısı vurğulayıb ki, gələcəkdə bəzi sahələrdə lisenziyaların verilməsi ictimai təşkilatlara da həvalə edilə bilər. Bəzi ölkələrdə lisenziyaların ictimai təşkilatlar tərəfindən də verildiyini qeyd edən M.Musayev bildirib ki, bu üsul Azərbaycanda da tətbiq oluna bilər: «Yəqin ki, gələcəkdə lisenziyaların verilməsində sahəvi ictimai qurumların iştirakına da baxılacaq. Hazırda bu məsələni ilkin olaraq müzakirə edirik».

ASK sədri qeyd edib ki, idarəetmə sistemini təkmilləşdirmək üçün bu məsələ yenidən gündəmə gələ bilər.