Sahibkarlıq

Ana səhifə

Sahibkarlıq

Azərbaycan Parisdə keçirilən kontrafakt və piratçılıqla mübarizə üzrə tədbirdə iştirak edib

07 fevral 2011 15:58 (UTC +04:00)

Bakı. Nicat Mustafayev - APA-Economics. Azərbaycan Parisdə (Fransa) keçirilən Ümumdünya Əqli Mülkiyyət Təşkilatı və Fransa Əqli Mülkiyyət İdarəsi tərəfindən təşkil olunmuş kontrafakt və piratçılıqla mübarizə üzrə VI Qlobal Konqresdə iştirak edib.

Azərbaycan Standartlaşdırma, Metrologiya və Patent üzrə Dövlət Komitəsinin mətbuat xidmətindən «APA-Economics»ə verilən məlumata görə, «Əqli mülkiyyətə hörmətin təmin edilməsi - qlobal problemlərin effektli həlli» adı altında keçirilən tədbirdə Azərbaycanı Standartlaşdırma, Metrologiya və Patent üzrə Dövlət Komitəsinin sədri Ramiz Həsənov təmsil edib.

Konqresin işində 100-ə yaxın ölkə və beynəlxalq təşkilatdan 800-dək qonaq iştirak edib. Konqresin əsas müzakirə mövzuları konrtrafakt və piratçılıqla mübarizə istiqamətində əqli mülkiyyət sahəsinin inkişaf etdirilməsinin zəruriliyi, bununla bağlı qanunvericiliyin təkmilləşdirilməsi, əqli mülkiyyətə hörmət mühitinə yeni yanaşmanın bərqərar olması, korporativ məsuliyyət, internet vasitəsilə ticarətin yaratdığı problemlər və s. olub.

Konqresdən sonra R.Həsənov Ümumdünya Əqli Mülkiyyət Təşkilatının Sədri Frensis Qarri ilə görüşüb. Görüş zamanı ikitərəfli əməkdaşlıq əlaqələrinə bir daha nəzər yetirilib. Görüş zamanı R.Həsənov F.Qarrini Azərbaycana dəvət edib, qarşı tərəf isə dəvəti məmnuniyyətlə qəbul edib.

Səfər çərçivəsində Komitə sədri həmçinin Fransa Əqli Mülkiyyət İdarəsinin direktoru İv Lapyer ilə də görüşüb. Görüşdə qarşılıqlı əməkdaşlıq perspektivləri müzakirə edilib, bununla bağlı qarşılıqlı hüquqi sənədlərin hazırlanması və qəbul edilməsi təklif edilib. Əsas diqqət coğrafi göstəricilərin, adların mühafizəsi, bu sahədə hüquq pozuntularının qarşısını almaq üçün birgə mübarizə və s. məsələlər olub.

Bundan başqa, R.Həsənov mərkəzi ofisi Paris şəhərində yerləşən Ölçülər və Çəkilər üzrə Beynəlxalq Büronun direktoru Maykl Kühne və Büronun məsul şəxsləri ilə görüş keçirib. Əsas müzakirə mövzusu Azərbaycanın milli etalonları və ölçü vahidlərinin beynəlxalq tanınması məqsədilə müvafiq işlərin təşkili, bu sahədə Büronun rəy və təkliflərini əldə etmək olub.