Sahibkarlıq

Ana səhifə

Sahibkarlıq

Bakıda Azərbaycan-Litva biznes-forumu keçirilir

09 fevral 2011 08:06 (UTC +04:00)

“APA-Economics”in xəbərinə görə, Azərbaycan İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (“Azpromo”nun) təşkilatçılığı ilə keçirilən tədbirdə çıxış edən Azərbaycan Milli Məclisinin sədri Oqtay Əsədov iki ölkə arasında əlaqələrin bütün istiqamətlərdə inkişaf etməsini yüksək qiymətləndirib.

Onun sözlərinə görə, iki ölkə arasında ticarət dövriyyəsi yüksələn xətlə inkişaf edir: “Azərbaycan və Litva arasında qeyri-neft sektorunu inkişaf etdirmək üçün böyük imkanlar mövcuddur. Əminəm ki, biznes-forumda aparılan müzakirələr gələcəkdə iki ölkə arasında birgə müəssisələrin yaradılmasına, qarşılıqlı investisiya yatırımına, ticarət dövriyyəsinin artmasına və iqtisadiyyatın bir çox sahələrində əməkdaşlığın inkişaf etdirilməsinə imkan yaradacaq”.

Azərbaycanın iqtisadi uğurlarından danışan spiker ölkəmizin regionda lider mövqedə olduğunu bildirib: “Son 10 il ərzində ölkənin dövlət büdcəsi 15 dəfəyə qədər artıb, valyuta ehtiyatları 30 mlrd. dollara çatıb”.

Litva Seyminin sədri xanım İrena Dyaqutene qeyd edib ki, biznes-forum iki ölkə arasında mövcud əlaqələri dərinləşdirəcək, Litva biznesinin Azərbaycanda genişlənməsinə imkan yaradacaq: “Son iki ildə ölkələrimiz arasında ticarət dövriyyəsi 30% artıb, lakin bu göstəricini artırmaq üçün geniş imkanlar var”.

İnformasiya texnologiyaları, ətraf mühitin qorunması və qida sənayesi sahəsində Litvanın böyük təcrübəyə malik olduğunu bildirən spiker bu təcrübəni Azərbaycanla bölüşməyə hazır olduqlarını bildirib: “Biznes-forumda Litvanı tikinti, İKT, tekstil, tibb, kənd təsərrüfatı, energetika və təhsil sahələrində çalışan şirkətlər və qurumlar təmsil edir. Artıq Litvanın 9 ali məktəbində azərbaycanlı tələbələr təhsil alır və onların hamısı ödənişdən azad olunub”.

Biznes-forumda Azərbaycan və Litvanın biznes və investisiya imkanlarına dair təqdimat keçirilib, Litvanın “İnta” və Azərbaycanın “Kiber” şirkətləri arasında anlaşma memorandumu imzalanıb. Tədbirdə Azərbaycandan 60-a yaxın, Litva tərəfdən 20-yə yaxın şirkət iştirak edir.