Sahibkarlıq

Ana səhifə

Sahibkarlıq

Aran iqtisadi rayonunun sahibkarlarına 454 min manat məbləğində güzəştli kredit verilib

11 fevral 2011 12:47 (UTC +04:00)

Bakı. Nicat Mustafayev - APA-Economics. Bu gün Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) İmişlidə «Regionlarda sahibkarlığın inkişafına dövlət dəstəyi» mövzusunda tədbir keçirib.

Nazirlikdən «APA-Economics»ə verilən məlumata görə, tədbirdə Aran iqtisadi rayonunda fəaliyyət göstərən 250-dək sahibkar iştirak edib.

Tədbirdə çıxış edən İqtisadi İnkişaf Nazirliyinin Sahibkarlığın inkişafı siyasəti şöbəsinin müdir müavini Elçin İbrahimov hazırda ölkədə qeyri-neft sektorunun inkişafının sürətləndiyini, davamlı sosial-iqtisadi inkişafa nail olunduğunu, əhalinin həyat səviyyəsinin daha da yaxşılaşdığını qeyd edib, regionlarda sahibkarlığın inkişafına dövlət dəstəyinin sistemli şəkildə həyata keçirilməsi nəticəsində iqtisadiyyatda özəl bölmənin rolunun daha da artdığını vurğulayıb.

Öz növbəsində İqtisadi İnkişaf Nazirliyinin Aran regional bölməsinin müdiri Elbrus Hüseynov məqsədli dövlət proqramlarında nəzərdə tutulmuş tədbirlərin həyata keçirilməsi istiqamətində İmişli rayonunda görülmüş və görüləcək işlər barədə məlumat verib.

Tədbirdə çıxış edən SKMF-ın icraçı direktoru Şirzad Abdullayev Fondun fəaliyyəti, güzəştli kreditlər hesabına bölgələrdə, o cümlədən Aran iqtisadi rayonunda həyata keçirilən layihələr barədə tədbir iştirakçılarına məlumat verib ki, bildirib ki, Fond müvəkkil kredit təşkilatları vasitəsilə 2011-ci ilin ötən dövrü ərzində 144 sahibkarlıq subyektinin investisiya layihələrinin maliyyələşdirilməsinə 10,9 mln. manat güzəştli kredit verib. Ş.Abdullayev 2011-ci ildə SKMF-ın güzəştli kredit vəsaitlərinin yönəldiləcəyi əsas sahələr barədə tədbir iştirakçılarını məlumatlandırıb.

Tədbir çərçivəsində həmçinin sahibkarlar üçün güzəştli kreditlərdən istifadə mexanizmi, investisiya layihələrinin hazırlanması və təqdim olunmasına dair maarifləndirici treninq keçirilib, həmçinin, müasir texnologiyaların tətbiqinə əsaslanan layihələrin əhəmiyyəti, SKMF-ın internet saytı barədə tədbir iştirakçılarına ətraflı məlumat verilib.

Bundan başqa, tədbirdə İmişli rayonunun iqtisadi potensialına uyğun olaraq, güzəştli kreditlər hesabına maliyyələşdirilməsi nəzərdə tutulan 20 hektarlıq intensiv bağçılıq təsərrüfatının (nar bağının), 500 başlıq südlük istiqamətli heyvandarlıq kompleksinin və 500 başlıq ətlik istiqamətli heyvandarlıq kompleksinin yaradılması üzrə nümunəvi investisiya layihələrinin təqdimatı keçirilib.

Eyni zamanda tədbir zamanı müvəkkil kredit təşkilatları vasitəsilə İmişli və ətraf rayonlarda fəaliyyət göstərən 37 sahibkarlıq subyektinə 454 min manat güzəştli kredit vəsaiti verilib ki, bu kreditlər hesabına 90-a yaxın yeni iş yerinin yaradılması nəzərdə tutulur.