Sahibkarlıq

Ana səhifə

Sahibkarlıq

Azərbaycanda sərhəd ticarətinin asanlaşdırılması məsələləri müzakirə edilir - FOTO

Azərbaycanda sərhəd ticarətinin asanlaşdırılması məsələləri müzakirə edilir - <font color=red>FOTO</font>

15 fevral 2011 11:19 (UTC +04:00)

Bakı. Əli Əhmədov – APA-Economics. Sərhəddə əməliyyat üsulları, proseduraların möhkəmləndirilməsi, risklərin təhlili və idarəçilik məsələləri bu gün Bakıda işə başlayan beynəlxalq seminarda müzakirə olunur. «APA-Economics»in məlumatına görə, dörd gün davam edəcək seminar «Cənubi Qafqaz ölkələrində inteqrə edilmiş sərhəd idarəçiliyi sistemlərinə dəstək Layihəsi» çərçivəsində keçirilir. Avropa İttifaqı və BMT-nin İnkişaf Proqramı ilə birgə icra olunan bu layihə 2010-cu ilin sentyabrından başlanıb.

Azərbaycanın Dövlət Gömrük Komitəsi (DGK), Dövlət Sərhəd və Miqrasiya xidmətlərinin mütəxəssisləri ilə yanaşı Gürcüstanın Sərhəd və Patrul Polisi, Maliyyə Xidmətinin əməkdaşları və Beynəlxalq Miqrasiya Siyasəti İnkişaf Mərkəzinin (ICMPD) Latviyadan olan ekspertləri də iştirak edirlər.

«Cənubi Qafqaz ölkələrində inteqrə edilmiş sərhəd idarəçiliyi sistemlərinə dəstək Layihəsi»nin Aəzrbaycan üzrə meneceri Məzahir Əfəndiyev bildirib ki, Azərbaycanın Avropaya sürətli inteqrasiyası sərhəd idarəçiliyi sistemində də yeni yanaşmalara və idarəçilik metodlarına zərurət yaradır. Bu layihənin məqsədlərindən biri də məhz bu işlərin reallaşdırılmasıdır. Azərbaycanda gömrük sistemində «vahid pəncərə» prinsipinin tətbiq olunduğunu və idxal-ixrac əməliyyatlarının sadələşdirildiyini xatırladan M.Əfəndiyev bildirib ki, bununla yanaşı bu layihə çərçivəsində boşluqların aradan qaldırılması, sərhəd təhlükəsizliyini əhatə edən yeni normativ-hüquqi sənədlərin hazırlanması gündəmdədir.

Tədbirdə DGK-ni təmsil edən Baş İdarə rəisi Şahin Bağırovun sözlərinə görə, əsas məsələ sərhəd idarəçiliyinin imkanlarının genişləndirilməsi, sərhəd-keçid proseduralarının sadələşdirilməsi, risklərin müəyyənləşdirilib qarşısının alınmasıdır və sərhəd idarəçiliyi sistemi bu vəzifələrə yardım edəcək. Ş.Bağırov sərhəd-keçid proseduralarının sadələşdirilməsinin həm normativ-hüquqi müstəvidə, həm də mövcud proseduraların daha da asanlaşdırılması və sürətləndirilməsi formasında həyata keçiriləcəyini bildirib: «Yeni qaydaların tətbiqi vasitəsilə insanların hərəkətinə daha əlverişli şəraitin yaradılması nəzərdə tutulur, tədbirdə bununla bağlı müzakirələr aparılır və beynəlxalq təcrübə öyrənilir».

Seminarda əsasən risklərin təhlili prosesinin təşkili və idarə olunması sahəsində Avropa standartları təqdim olunacaq. Bundan başqa, İnteqrə Edilmiş Sərhəd İdarəçiliyinin əməliyyat üsulları və proseduralarının öyrənilməsi, onların inkişaf etdirilməsinə dair tərəflər arasında təcrübə mübadiləsi aparılacaq, habelə sərhəd təhlükəsizliyi və ticarətin asanlaşdırılması sahəsində beynəlxalq standartlara uyğun proseduraların inkişafını təmin edən təqdimatlar dinləniləcək.