Sahibkarlıq

Ana səhifə

Sahibkarlıq

Bakıda 1 tondan artıq kolbasa və kolbasa məhsulları satışdan çıxarılaraq məhv edilib

15 fevral 2011 13:46 (UTC +04:00)

Bakı. Nicat Mustafayev - APA-Economics. Azərbaycanda ət məhsullarının istehsalı və satışının qanunauyğunluğu yoxlanılır.

Azərbaycan İqtisadi İnkişaf Nazirliyindən «APA-Economics»ə verilən məlumata görə, Nazirlik yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən istehlak bazarında aparılan monitorinqlər zamanı Bakı şəhəri, Sabunçu rayonu, E.Mehdiyev küçəsi, 3V ünvanında Anar Rzayevə məxsus istehsalat sahəsində istehsal olunmuş kolbasaların üzərində saxlama müddətinin göstərilmədiyi aşkar edilib.

Bununla əlaqədar Dövlət Xidməti tərəfindən A.Rzayevə məxsus istehsalat sahəsində ət məhsullarının istehsalı və satışının qanunauyğunluğu ilə bağlı araşdırmalara başlanılıb. Aparılan araşdırmalar zamanı «Kurinaya», «Russkaya», «Servelat», «Lyubitelskaya», «Qovyajaya», «Moloçnaya», «Moskovskaya», «Halal Prima», «Halal», «Oxotniçiy», «Sinyuqa», «Doktorskaya» kolbasalarının gigiyenik və uyğunluq sertifikatları olmadan istehsal edildiyi, həmçinin müəssisənin anbarında saxlama müddəti ötmüş 20 kq ədviyyatın olduğu müəyyən edilib.

Gigiyenik və uyğunluq sertifikatı olmadan istehsal edilmiş 755 kq kolbasa və 250 kq etiketlənməmiş kolbasa məhsulları, həmçinin saxlama müddəti ötmüş 20 kq ədviyyat Dövlət Xidmətinin əməkdaşlarının iştirakı ilə qanunvericiliyə müvafiq qaydada məhv edilib.

Aşkar edilmiş qanun pozuntuları ilə əlaqədar kolbasa istehsalı və satışının dayandırılması və müəssisə tərəfindən istehsal edilərək ticarət şəbəkəsinə paylanmış kolbasaların geri yığılması barədə sahibkar A.Rzayevə icrası məcburi göstəriş verilib.

Haqsız rəqabətə yol verdiyinə görə A.Rzayev barəsində antiinhisar qanunvericiliyinin tələblərinin pozulması əlamətləri üzrə iş qaldırılıb.