Sahibkarlıq

Ana səhifə

Sahibkarlıq

Bakıda sertifikatsız istehsal edilmiş 60 kq kolbasa və saxlama müddəti ötmüş 750 kq toyuq əti məhv edilib

16 fevral 2011 14:03 (UTC +04:00)

Bakı. Nicat Mustafayev - APA-Economics. Azərbaycan İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən keyfiyyətsiz kolbasa məhsulları aşkarlanıb.

Nazirlikdən «APA-Economics»ə verilən məlumata görə, Dövlət Xidməti tərəfindən istehlak bazarında aparılan monitorinqlər zamanı Suraxanı rayonu, Qaraçuxur qəsəbəsi, Şərq massivində Ruslan Şərifova məxsus istehsalat sahəsində istehsal olunmuş «Servelat» kolbasalarının üzərində saxlama müddətinin göstərilmədiyi aşkar edilib.

Bununla əlaqədar Dövlət Xidməti tərəfindən Ruslan Şərifova məxsus istehsalat sahəsində ət məhsullarının istehsalı və satışının qanunauyğunluğu ilə bağlı araşdırmalara başlanılıb.

Aparılan araşdırmalar zamanı «Servelat» kolbasalarının gigiyenik və uyğunluq sertifikatı olmadan istehsal edildiyi, habelə müəssisənin anbarında saxlama müddəti ötmüş 750 kq toyuq ətinin olduğu aşkar edilib.

Gigiyenik və uyğunluq sertifikatı olmadan istehsal edilmiş 60 kq kolbasa və saxlama müddəti ötmüş 750 kq toyuq əti Dövlət Xidmətinin əməkdaşlarının iştirakı ilə qanunvericiliyə müvafiq qaydada məhv edilib.

Aşkar edilmiş qanun pozuntuları ilə əlaqədar, «Servelat» kolbasalarının istehsalının dayandırılması və müəssisə tərfindən istehsal edilərək ticarət şəbəkəsinə paylanmış həmin kolbasaların geri yığılması barədə sahibkar R.Şərifova icrası məcburi göstəriş verilib.

Haqsız rəqabətə yol verdiyinə görə R.Şərifov barəsində antiinhisar qanunvericiliyinin tələblərinin pozulması əlamətləri üzrə iş qaldırılıb.