Sahibkarlıq

Ana səhifə

Sahibkarlıq

Bakıda Azərbaycan-Macarıstan işgüzar görüşü keçirilib

25 fevral 2011 09:11 (UTC +04:00)

Bakı. Əli Əhmədov – APA-Economics. Bu gün Bakı Biznes Mərkəzində İqtisadi İnkişaf Nazirliyinin dəstəyi, Azpromo və Macarıstanın Azərbaycandakı səfirliyinin təşkilatçılığı ilə Azərbaycan-Macarıstan işgüzar görüşü keçirilib. «APA-Economics»in məlumatına görə, tədbirdə hər iki ölkənin dövlət rəsmiləri ilə yanaşı, İKT, kənd təsərrüfatı, sənaye, nəqliyyat, tikinti və s. sahələrdə fəaliyyət göstərən 60-dan çox iş adamı iştirak edib.
Tədbirdə Azərbaycanın iqtisadi inkişaf nazirinin müavini Niyazi Səfərov bildirib ki, Azərbaycan ilə Macarıstan arasında ticarət dövriyyəsi kiçik olsa da, geniş müqavilə-hüquq bazası mövcuddur: «Bura əsas müqavilələr, o cümlədən ikiqat vergiqoymanın aradan qaldırılması, investisiyaların qorunması və s. haqqında müqavilələr daxildir».
Macarıstanın Azərbaycanla əməkdaşlığın genişləndirilməsində maraqlı olduğunu deyən Macarıstan Milli İnkişaf Nazirliyinin dövlət Katibinin müavini Peter Olajos iki ölkə arasında biznes əlaqələrinin qurulması üçün bütün lazımi sazişlərin qüvvəyə mindiyini bildirib. Azərbaycanla Macarıstanın təqribən eyni böyüklükdə olduğunu (Macarıstanda əhalinin sayı 10 mln., Azərbaycanda 9,1 mln. nəfər təşkil edir) deyən qonağın sözlərinə görə, iki ölkə arasında fərq ondadır ki, Azərbaycan neft və qazla zəngindir. Macarıstan isə əksinə neftin 100%-ni, qazın isə 80%-ni xaricdən alır: «Biz bu məsələdə Rusiyadan çox asılıyıq və alternativ yolları, o cümlədən «Nabucco» layihəsini dəstəkləyirik».
Qonaq bildirib ki, Azərbaycanla Macarıstan arasında tarixi əhaləqələr güclü, ümumi cəhətlər isə çox olsa da, son 20 ildə əlaqələr itib, ticarət həcmi azalıb. Bu gün Macarıstanın ixracının 56%-ni maşınqayırma, 36%-ni emal məhsullar, 6%-ni isə ərzaq və içkilər təşkil edir. Macarıstanın maliyyə böhranından ciddi zərər çəkdiyini deyən P.Olajos böhran zamanı ÜDM-in 7% azaldığını bildirib. Onun sözlərinə görə, Avropa İttifaqına üzvlük nəticəsində Macarıstan böyük bazarın tərkib hissəsinə çevrilib: «Bizim 500 mln-dan artıq istehlakçıya çıxışımız var». Son 20 ildə ölkəyə 80 mlrd. dollar birbaşa investisiya qoyulub. Əsas investorlar ABŞ, Almaniya, Hollandiya, İtaliya, Avstriya və s. ölkələrdən avtomobillər, maşınqayırma və s. məhsullar istehsal olunur. Macarıstanda qeyri-neft sektorunun yaxşı inkişaf etdiyini deyən qonaq bu məhsulları ixcrac etmək istədiklərini bildirib.
Qonaq qeyd edib ki, Macarıstan tərəfi müxtəlif sahələrdə əməkdaşıq təklif edir: «Bakıya kənd təsərrüfatı, ərzaq, emal, tikinti, məlumat, maşınqayırma, alternativ enerji sahəsində fəaliyyət göstərən şirkətlərin nümayəndələri gəlib».
Bundan sonra, Azpromo rəhbəri Adil Məmmədov Azərbaycandakı biznes və investisiya imkanları və iqtisadi sahələr barədə qonaqlara məlumat verib – bunlar turizm obyeketləri və hotellərin tikintisi, kimya sənayesi, kənd təsərruüfatı və s-dir.