Sahibkarlıq

Ana səhifə

Sahibkarlıq

Xırdalanda «Korrupsiya riskləri və onların aradan qaldırılması» mövzusunda tədbir keçirilib

04 mart 2011 13:38 (UTC +04:00)

Bakı. Nicat Mustafayev - APA-Economics. Bu gün Xırdalan şəhərində sahibkarlığın inkişafına dövlət dəstəyinin daha da gücləndirilməsi, sahibkarların maarifləndirilməsi, onların məsləhət-informasiya təminatının yaxşılaşdırılması məqsədilə «Korrupsiya riskləri və onların aradan qaldırılması» mövzusunda tədbir keçirilib.

İqtisadi İnkişaf Nazirliyindən (İİN) «APA-Economics»ə verilən məlumata görə, İİN-in, Abşeron rayon İcra Hakimiyyətinin dəstəyi, nazirliyin Bakı Biznes Tədris Mərkəzinin təşkilatçılığı ilə keçirilən tədbirdə İqtisadi İnkişaf Nazirliyinin, Azərbaycan Sahibkarlar Konfederasiyasının (ASK), Abşeron rayon İcra Hakimiyyətinin nümayəndələri, eləcə də Abşeron iqtisadi rayonunda fəaliyyət göstərən 100-ə yaxın sahibkar iştirak edib.

Tədbirdə çıxış edən Bakı Biznes Tədris Mərkəzinin direktoru Akif Fərruxov sahibkarların maarifləndirilməsi istiqamətində Mərkəz tərəfindən görülən işlər barədə məlumat verib və bildirib ki, sahibkarların hüquqi biliklərinin artırılması onların fəaliyyətində şəffaflığın təmin olunmasının mühüm amillərindəndir.

Tədbir çərçivəsində İİN-in, ASK-nın nümayəndələri mövzu ilə bağlı məruzələrlə çıxış ediblər. Tədbirdə həmçinin, İqtisadi İslahatlar Elmi-Tədqiqat İnstitutu tərəfindən sahibkarlar üçün «Korrupsiya ilə mübarizəyə siyasi sistemin hazırlığı və keçid iqtisadiyyatlı ölkələrdə müşahidə olunan meyllər. Korrupsiyanın qiymətləndirilməsi» mövzusunda təqdimat keçirilib.

Qeyd edək ki, analoji tədbirlər martın 1-də Gəncə, martın 2-də isə Qazax şəhərlərində keçirilib. Bakı Biznes Tədris Mərkəzi «Korrupsiya riskləri və onların aradan qaldırılması» mövzusunda tədbirləri mart-aprel ayları ərzində digər iqtisadi rayonlarda da keçirməyi planlaşdırır.