Sahibkarlıq

Ana səhifə

Sahibkarlıq

«McDonald’s» artıq dünyanın ən böyük restoranlar şəbəkəsi deyil

09 mart 2011 13:13 (UTC +04:00)

Bakı. Əli Əhmədov – APA-Economics. «Subway» fast-food şəbəkəsi obyektlərinin sayına görə özünün əsas rəqibi – «McDonald’s»ı keçərək dünyanın ən iri restoranlar şəbəkəsinə çevrilib. «APA-Economics»in «The Wall Street Journal»a istinadən verdiyi məlumata görə, 2010-cu ilin sonunda «Subway»in bütün dünyadakı satış nöqtələrinin sayı 33 749-a çatıb, «McDonald’s»da isə bu rəqəm 32 737 olub. Amerika bazarında isə «Subway» «McDonald’s»ı hələ 9 il əvvəl geridə qoyub.

Qeyd edək ki, «Subway» özünün ilk restoranını ABŞ-dan kənarda 27 il əvvəl açıb. Belə ki, 1984-cü ildə şirkət Bəhreyndə satışa başlayıb. Hazırda şirkətin dünya üzrə (ABŞ istisna olmaqla) 10 mindən bir qədər az satış nöqtəsi var. Onların toplam illik dövriyyəsi 4,7 mlrd. dollardır. Müqayisə üçün bildirək ki, ABŞ-da «Subway» hər il 10,5 mlrd. dollarlıq sendviç satır.

«McDonald’s»ın özündə isə şirkətin restoranlarının sayına görə olmasa da, dövriyyəsinə görə hələ də dünya lideri olduğunu bildirirlər. CNN teleşirkətinin məlumatına görə, «Subway» restoranlarının hamısı françayzinq prinsipi əsasında işləyir, «McDonald’s»da isə franşçayzinq restoranların yalnız bir hissəsini əhatə edir.

Ümumiyyətlə, ABŞ bazarındakı sıxlığa görə yerli qida şəbəkələri getdikcə daha çox inkişaf etməkdə olan ölkələrə, xüsusilə də Asiya bazarına üz tutur. «Subway»in özü 2020-ci ildə ABŞ-dan kənardakı restoranların sayını ölkə daxilindəki həddə çatdırmağı planlaşdırır. Digər şəbəkə - «Starbucks» isə yaxın vaxtlarda Çindəki kofexanaların sayını 3 dəfə artırmaq niyyətindədir. Çin bazarı ilə «Dunkin’ Brands» da maraqlanır: ponçik satıcısı bu ölkədə yüzlərlə yeni satış nöqtəsi açmağı planlaşdırır.