Sahibkarlıq

Ana səhifə

Sahibkarlıq

Bu ilin əvvəlindən Azərbaycan sahibkarlarına 23 mln. manat güzəştli kreditlər verilib

11 mart 2011 10:50 (UTC +04:00)

Bakı. Nicat Mustafayev - APA-Economics. Bu gün Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) Yevlaxda «Regionlarda sahibkarlığın inkişafına dövlət dəstəyi» mövzusunda tədbir keçirib.

Nazirlikdən «APA-Economics»ə verilən məlumata görə, tədbirdə Aran iqtisadi rayonunda fəaliyyət göstərən 180-ə yaxın sahibkar iştirak edib.

İqtisadi İnkişaf Nazirliyinin Sahibkarlığın inkişafı siyasəti şöbəsinin müdir müavini Elçin İbrahimov hazırda Azərbaycanda qeyri-neft sektorunun inkişafının sürətləndiyini, davamlı sosial-iqtisadi inkişafa nail olunduğunu, əhalinin həyat səviyyəsinin daha da yaxşılaşdığını qeyd edib, regionlarda sahibkarlığın inkişafına dövlət dəstəyinin sistemli şəkildə həyata keçirilməsi nəticəsində iqtisadiyyatda özəl bölmənin rolunun daha da artdığını vurğulayıb.

İqtisadi İnkişaf Nazirliyinin Aran regional bölməsinin müdiri Elbrus Hüseynov məqsədli dövlət proqramlarında nəzərdə tutulmuş tədbirlərin həyata keçirilməsi istiqamətində Yevlax rayonunda görülmüş və görüləcək işlər barədə məlumat verib.

Öz növbəsində SKMF-ın icraçı direktoru Şirzad Abdullayev Fondun fəaliyyəti, güzəştli kreditlər hesabına bölgələrdə, o cümlədən Aran iqtisadi rayonunda həyata keçirilən layihələr barədə tədbir iştirakçılarına məlumat verib və bildirib ki, SKMF müvəkkil kredit təşkilatları vasitəsilə 2011-ci ilin ötən dövrü ərzində sahibkarlıq subyektlərinin 241 investisiya layihəsinin, o cümlədən yeni texnologiyaların tətbiqinə əsaslanan 17 böyük və iri həcmli investisiya layihəsinin (5 müasir çörək istehsalı müəssisəsinin, 2 soyuducu anbar kompleksinin, südlük istiqamətli cins heyvandarlıq kompleksinin, müasir istixana kompleksinin, 3 quşçuluq təsərrüfatının, ət emalı (kəsim sexi), bitki mənşəli qida yağları istehsalı, mebel istehsalı, kağız və karton məmulatları istehsalı və 1 kənd təsərrüfatı məhsulları istehsalı müəssisəsinin yaradılması üzrə layihələrin) maliyyələşdirilməsinə 23 mln. manat güzəştli kredit verib.

Tədbir çərçivəsində sahibkarlar üçün güzəştli kreditlərin əldə olunması proseduru, istifadə mexanizmi, sahibkarlıq subyektləri tərəfindən təqdim edilən investisiya layihələrinin tərtib edilməsinə dair minimal tələblər və SKMF ilə əməkdaşlıq edən müvəkkil kredit təşkilatları barədə məlumatları əks etdirən broşürlər paylanıb, müasir texnologiyaların tətbiqinə əsaslanan layihələrin əhəmiyyəti, SKMF-ın internet saytı barədə tədbir iştirakçılarına ətraflı məlumat verilib.

Tədbirdə Yevlax rayonunun iqtisadi potensialına uyğun olaraq, güzəştli kreditlər hesabına maliyyələşdirilməsi nəzərdə tutulan 3 istiqamət üzrə – gündəlik istehsal gücü 10 ton olan müasir çörək zavodunun, illik istehsal gücü 2 min ton olan müasir ətlik istiqamətli quşçuluq təsərrüfatının və faraş tərəvəz məhsullarının yetişdirilməsi üçün müasir istixana kompleksinin yaradılması üzrə nümunəvi investisiya layihələrinin təqdimatı keçirilib.

Bundan başqa, müvəkkil kredit təşkilatları vasitəsilə Yevlax və ətraf rayonlarda fəaliyyət göstərən 35 sahibkarlıq subyektinə 418 min manat güzəştli kredit vəsaiti verilib. Bu kreditlər hesabına 70-dən çox yeni iş yerinin yaradılması nəzərdə tutulur.