Sahibkarlıq

Ana səhifə

Sahibkarlıq

«Ramstore» ticarət şəbəkəsi adını dəyişib

14 mart 2011 12:50 (UTC +04:00)

Bakı. Əli Əhmədov – APA-Economics. Azərbaycanın ən böyük ticarət şəbəkələrindən biri olan «Ramstore» adını dəyişir.

Bundan sonra «Bazarstore» adlanacaq satış şəbəkəsi fəaliyyətini yeni konsepsiya ilə davam etdirəcək.

«Bazarstore» marketlər şəbəkəsinin baş direktoru Ruslan Əliyev «APA-Economics»ə bildirib ki, şirkətin atdığı ilk addım qiymətlərin aşağı salınması olub. Son bir neçə gün ərzində şəbəkədəki malların qiymətləri 25%-dək ucazlaşdırılıb. Ucuzlaşma həm ərzaq, həm də qeyri-ərzaq malları olmaqla ümumilikdə burada satılan 15 min adda məhsulun 8 minə qədərini əhatə edib. Başqa sözlə şəbəkə vasitəsilə satılan malların 60%-ə qədərində qiymətlər 25%-dək aşağı düşüb.

Baş direktorun sözlərinə görə, şəbəkənin əvvəlki sahiblərindən fərqli olaraq «Bazarstore» buna bəzi xərcləri azaltmaq və daha effektiv marketinq siyasəti sayəsində nail olub. Belə ki, ilkin araşdırmalar göstərib ki, əvvəlki idarəçilər bəzi sahələrə (məsələn, mühafizəyə) lazım olduğundan artıq vəsait sərf edir, istehsalçı şirkətlərdən malı optimal qiymətlərlə ala bilmirdilər: «Bizdə isə bu iş daha yaxşı təşkil olunub, bu isə xərcləri optimallaşdırmağa və qiymətləri aşağı salmağa imkan verir».

Satılan malların çeşidində də dəyişikliklər var. Məsələn, ilk növbədə burada ət satışına başlanıb. Bəzi məhsullar, o cümlədən süd və toyuq məhsullarının çeşidləri artıb və s. Bundan başqa R.Əliyev bildirib ki, şəbəkədə ancaq xüsusi nəzarətdən keçmiş mallar satılacaq: «Şəbəkənin endirimlərə indi başlaması təsadüfi deyil. «Bazarstore» Novruz Bayramı ərəfəsində satıcılara digər yerlərdən daha aşağı qiymətlər təklif edir».

Şirkət rəhbərliyi bəyan edir ki, aparılan islahatlar nəticəsində indiyədək qiymətləri nisbətən imkanlı təbəqə üçün uyğun olan şəbəkənin müştəri auditoriyası genişlənəcək: «Artıq gəlirdən asılı olmayaraq hər kəs «Bazarstore»un müştərisi ola bilər. Buna satış şəbəkəsindəki məhsul çeşidinin bolluğu, qiymətlərin münasibliyi və ən əsası, yüksək keyfiyyət tam şərait yaradır», - deyə şirkətin rəsmi məlumatında bildirilir. Şirkət rəhbərliyi süni qiymət artımının qarşısının alınmasında da «Bazarstore»un mühüm rol oynayacağını bildirib.

«Bazarstore» rəhbərliyi yaxın gələcəkdə şirkətdə gözlənilən yenilikləri də açıqlayıb. Belə ki, ilin sonunadək biri Bakıda, digəri Gəncədə olmaqla şirkətin daha iki mağazası açılacaq. Hələlik Bakıda bunun harada olacağı bilinmir. Amma şirkət rəsmiləri yeni marketin əhalinin sıx olduğu ərazidə açılacağını bildirib, buna misal olaraq Əhmədli, Yasamal, Qaradağ və s. ərazilər göstərilir. Hazırda 65 işçisi olan «Bazarstore»un Bakıda 3 mağazası var. Rebrendinq prosesinin - «Ramstore» brendinin «Bazarstore» ilə əvəz olunmasının isə 2 aya başa çatdırılması planlaşdırılır.