Sahibkarlıq

Ana səhifə

Sahibkarlıq

Ötən il Azərbaycanda antiinhisar qanunvericiliyinin pozulması əlamətləri üzrə 46 qərar qəbul edilib

15 mart 2011 10:50 (UTC +04:00)

Bakı. Əli Əhmədov - APA-Economics. Azərbaycanda bəzi sahibkarlar hələ də saxlama və yararlılıq müddətləri ötmüş, sertifikatlaşdırılmamış malların satılması, tərkibi normativ-texniki sənədlərə və etiket göstəricilərinə uyğun olmayan malların satılması və s. kimi qanun pozuntularına yol verirlər. «APA-Economics»in məlumatına görə, bu barədə 15 mart - Ümumdünya istehlakçı hüquqlarının müdafiəsi günü ilə bağlı «Azərbaycanda istehlakçı hüquqları qorunur» mövzusunda Bakı Biznes Mərkəzində keçirilən konfransda məlumat verilib.

İqtisadi İnkişaf Nazirliyi Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin təşkil etdiyi tədbirdə aidiyyəti dövlət qurumları, beynəlxalq və ictimai təşkilatların nümayəndələri, eləcə də 150-ə yaxın sahibkar iştirak edib.

Xidmətin rəisi Zahid İsayev bildirib ki, istehlakçıların hüquqlarının qorunması, eləcə də bazara keyfiyyətsiz və sağlamlıq üçün təhlükəli malların daxil olmasının qarşısını almaq üçün nəzarət tədbirləri, eləcə də maarifləndirmə işləri aparılır.

Xidmətin rəis müavini Vidadi Quliyev bildirib ki, ötən il mənşəyi məlum olmayan, müddəti ötmüş, tələblərə cavab verməyən malların satışının qarşısını almaq üçün Xidmət tərəfindən 2092 nəzarət tədbiri həyata keçirilib. Bunun 1758-də qanunun pozulduğu aşkar edilib.

Görülmüş tədbirlər nəticəsində tələblərə cavab verməyən 1350,7 ton, mənşəyi məlum olmayan, saxlama müddəti ötmüş və düzgün etiketlənmədiyinə görə 444,2 ton ərzaq malları satışdan çıxarılıb.

Pozuntularına yol vermiş sahibkarlıq subyektləri barəsində, ümumilikdə 1740 qərar qəbul edilib və həmin qərarlar əsasında, 2349,3 min manat cərimə təyin edilib. Antiinhisar qanunvericiliyinin tələblərinin pozulması əlamətləri üzrə 46 qərar qəbul edilib və pozuntusuna yol vermiş təsərrüfat subyektlərinə qarşı 944,9 min manat maliyyə sanksiyası tətbiq edilib.

Qeyd edilən təkmilləşdirmələrin nəticəsi olaraq Dövlət Xidmətinə 2010-cu il ərzində ümumilikdə 903 müraciət daxil olub ki, bu da əvvəlki illərə nisbətən xeyli çoxdur. Bu müraciətlərin 306-sı istehlakçı hüquqlarının pozulması, 597-si isə digər məsələlərlə bağlı olmuşdur. İstehlakçı hüquqları ilə bağlı daxil olmuş ərizə və müraciətlərin məzmununa görə 48-i ərzaq, 32-si qeyri ərzaq malları, 36-sı məişət əşyaları, 4-ü ictimai iaşə, məişət və digər xidmət sahələri, 78-i kommunal, 6-sı nəqliyyat, 12-si rabitə xidmətləri, 48-i digər xidmətlər, 36-sı mobil telefon, 5-i digər mallar, 1-i isə istehlakçının aldadılması ilə bağlı olub.