Sahibkarlıq

Ana səhifə

Sahibkarlıq

Bakının ticarət mərkəzlərində vergi ödəyicilərinə xidmət terminalları yaradılıb

16 mart 2011 15:07 (UTC +04:00)

Bakı. Vahab Rzayev – APA-Economics. Bakı şəhərinin ən böyük ticarət mərkəzlərindən olan «Sədərək» və «ArazAvia» firmalarına məxsus ticarət obyektlərində sahibkarlıq fəaliyyətini həyata keçirən şəxslərə müvafiq izahatların verilməsi və onlara vergi qanunvericiliyi ilə bağlı köməkliklərin göstərilməsi məqsədilə Bakı şəhər Vergilər Departamenti vergi ödəyicilərinə xidmət terminalları yaradıb. Vergilər Nazirliyindən «APA-Economics»ə verilən məlumata görə, müraciət edən şəxslərə müvafiq xidmətlərin göstərilməsi məqsədilə terminallar bütün zəruri avadanlıqlarla təchiz olunmaqla yanaşı, Bakı şəhər Vergilər Departamentinin bir qrup əməkdaşı bu terminallara cəlb edilib.

Vergi ödəyicilərinə xidmət terminallarında sahibkarlıq fəaliyyətini ticarət mərkəzlərində həyata keçirən şəxslərə heç bir vergi orqanına getmədən vergi qanunvericiliyi, vergi öhdəlikləri və onların yerinə yetirilməsi müddətləri, həmçinin yeni sahibkarlıq fəaliyyətinə başlayan şəxslərə vergi ödəyicilərinin uçotu prosesləri barədə məlumatların verilməsi və eləcə də «Fiziki şəxsin sahibkarlıq uçotu haqqında» ərizələrin qəbul edilməsi və onlara VÖEN verilməsi həyata keçirilir. Qeyd edək ki, vergi orqanında uçota alınmaq üçün terminallara «Fiziki şəxsin sahibkarlıq uçotu haqqında» ərizə təqdim etmiş şəxslər bir gün ərzində vergi ödəyicisi kimi uçota alınaraq onlara VÖEN verilir.

Nazirliyin məlumatına görə, son bir ay ərzində ticarət mərkəzlərində yaradılmış vergi ödəyicilərinə xidmət terminallarına sahibkarlıq fəaliyyəti ilə məşğul olan 900-ə yaxın şəxs müxtəlif məzmunlu məsələlərlə bağlı müraciət edib və vergi xidməti orqanı əməkdaşları tərəfindən onlara lazımi yardım göstərilib. Müraciət edən şəxslərdən 700-ə yaxını vergi ödəyicisi kimi uçota alınaraq onlara VÖEN verilib.