Sahibkarlıq

Ana səhifə

Sahibkarlıq

Azərbaycanda pərakəndə ticarət və iaşə müəssisələri üzrə ümumi dövriyyə son bir ildə 8% artıb

17 mart 2011 12:39 (UTC +04:00)

Bakı. Nicat Mustafayev – APA-Economics. Bu ilin yanvar-fevral aylarında Azərbaycanda pərakəndə ticarət və iaşə müəssisələri üzrə əmtəə və xidmətlərin satışı 2010-cu ilin eyni dövrünün səviyyəsini 7,8% üstələyərək 2,4 mlrd. manata bərabər olub.

Dövlət Statistika Komitəsindən «APA-Economics»ə verilən məlumata görə, ümumi artımın 95,1%-i pərakəndə ticarət müəssisələrinin fəaliyyəti sayəsində yaranıb.

Hesabat dövründə pərakəndə ticarət və iaşə şəbəkələrində hər bir ölkə sakini hər ay orta hesabla 132,2 manatlıq və ya 2010-cu ilin eyni dövründəkindən 20,2 manat çox pul vəsaiti xərcləyib.

Hesabat dövründə özəl müəssisələr üzrə pərakəndə ticarət və iaşə dövriyyəsinin ümumi həcmi 2 364,7 mln. manat, yaxud 2010-cu ilin yanvar-fevral ayları ilə müqayisədə 7,9% çox olub.

Cari ilin yanvar-fevral aylarında ticarət və iaşə şəbəkələrində əhaliyə satılmış ərzaq mallarının həcmi 3,5% artaraq 1,531 mlrd. manat, qeyri-ərzaq mallarının həcmi 19,8% artaraq 850 mln. manat olub.

Ərzaq mallarının 1 463,3 mln. manatı əhaliyə pərakəndə ticarət şəbəkəsi vasitəsi ilə satılmış və real həcmi əvvəlki ilin müvafiq dövrünün göstəricisini 3% üstələyib. Pərakəndə ticarət dövriyyəsinin ümumi həcmində ərzaq və qeyri-ərzaq mallarının xüsusi çəkisi müvafiq olaraq 63,3% və 36,7% təşkil edib. İctimai iaşə müəssisələrində əhaliyə 67,7 mln. manatlıq aşpazlıq məhsulları və digər ərzaq malları satılıb.

Hesabat dövrü ərzində hər bir ölkə sakini hər ay orta hesabla pərakəndə ticarət müəssisələrində 81,2 manatlıq ərzaq, 47,2 manatlıq qeyri-ərzaq malları alıb, iaşə müəssisələrində 3,8 manatlıq iaşə xidmətlərindən istifadə edib.

İaşə müəssisələri istisna olmaqla, pərakəndə ticarət şəbəkəsində əhaliyə 2 313,3 mln. manatlıq və ya əvvəlki ilin yanvar-fevral ayları ilə müqayisədə 7,5% çox əmtəə satılıb.

Pərakəndə ticarət dövriyyəsi üzrə real artımın 65,4%-i hüquqi şəxs statuslu və hüquqi şəxs yaratmadan sahibkarlıq fəaliyyəti göstərən fərdi sahibkarların ticarət müəssisələrinin, 34,6%-i isə yarmarka və bazarların ticarət fəaliyyəti sayəsində yaranıb.

İaşə müəssisələrinin dövriyyəsi 2010-cu ilin ilk iki ayı ilə müqayisədə 14,4% artaraq 67,7 mln. manata bərabər olub. Özəl müəssisələr üzrə əhaliyə 65,8 mln. manatlıq və ya 15% çox iaşə xidmətləri göstərilib.