Sahibkarlıq

Ana səhifə

Sahibkarlıq

Binə qəsəbəsində “Bakı qəsəbələrində sahibkarlığın inkişafına dövlət dəstəyi” mövzusunda tədbir keçirilib

18 mart 2011 11:08 (UTC +04:00)

Bakı. Nicat Mustafayev - APA-Economics. Bu gün İqtisadi İnkişaf Nazirliyinin (İİN) Sahibkarlığa Kömək Milli Fondu (SKMF) Binə qəsəbəsində “Bakı qəsəbələrində sahibkarlığın inkişafına dövlət dəstəyi” mövzusunda tədbir keçirib.

“APA-Economics”in məlumatına görə, tədbir çərçivəsində sahibkarlar üçün güzəştli kreditlərdən istifadə mexanizmi, investisiya layihələrinin hazırlanması və təqdim olunmasına dair maarifləndirici treninq keçirilib, həmçinin müasir texnologiyaların tətbiqinə əsaslanan layihələrin əhəmiyyəti barədə tədbir iştirakçılarına məlumat verilib.

Tədbirdə şəhərətrafı qəsəbələrdə fəaliyyət göstərən 200-ə yaxın sahibkar iştirak edib. İİN-in Sahibkarlığın inkişafı siyasəti şöbəsinin müdiri Zaur Qasımov çıxışında bildirib ki, son illər ölkənin qeyri-neft sektoru getdikcə inkişaf edir, regionların sosial-iqtisadi inkişafına nail olunub, əhalinin həyat şəraiti daha da yaxşılaşdırılıb, sahibkarlığın inkişafına dövlət dəstəyinin sistemli şəkildə həyata keçirilməsi nəticəsində iqtisadiyyatda özəl bölmənin rolu daha da artıb.

Nazirliyin Regionların inkişafı üzrə dövlət proqramları şöbəsinin müdiri Sahib Məmmədov məqsədli dövlət proqramında Bakı şəhərini və ətraf qəsəbələri əhatə edən tədbirlər, onların icrası, həmçinin görüləcək işlər barədə danışıb.

SKMF-in icraçı direktoru Şirzad Abdullayev qeyd edib ki, fondun güzəştli kreditləri hesabına şəhərətrafı qəsəbələrdə fəaliyyət göstərən sahibkarların intensiv zeytunçuluq təsərrüfatlarının yaradılması, müasir tələblərə cavab verən zeytun emalı və qablaşdırılması müəssisələrinin tikintisi, zəfərançılıq təsərrüfatının yaradılması, emalı və qablaşdırılması müəssisələrinin tikintisi, quşçuluq, çörək istehsalı müəssisələrinin yaradılması, bu istiqamətdə fəaliyyət göstərən sahibkarların dəstəklənməsi layihələrinin reallaşdırılması nəzərdə tutulub.

Tədbir çərçivəsində müvəkkil kredit təşkilatları vasitəsilə şəhərətrafı qəsəbələrdə fəaliyyət göstərən 24 sahibkarlıq subyektinə 2,2 mln. manat güzəştli kredit vəsaiti verilib. Bu kredit hesabına 190-a yaxın yeni iş yerinin yaradılması nəzərdə tutulub.