Sahibkarlıq

Ana səhifə

Sahibkarlıq

® Azərbaycan bazarına yeni şüşədə “Borjomi” daxil olub

28 mart 2011 12:10 (UTC +04:00)

“APA-Economics”in xəbərinə görə, bu ilin fevral ayında “IDS Borjomi Qruziya” şirkəti “Borjomi” mineral suyunu yeni qablaşdırmada Azərbaycan bazarına çıxarıb.

Yeni dizaynda olan şüşə daha mükəmməl və müasir formadadır. Onun üzərində istehsalçının marka nişanı olan “maral” daha qabarıq şəkildə təsvir edilib. Yazıların və təsvirlərin naxışları ənənəvi şüşədən fərqli olaraq, daha aydındır. Bu dəfə də müasir qapağa üstünlük verən şirkət etiketi ənənəvi üslubda (ağ və qırmızı rənglərdə) saxlasa da, şüşə üzərində onların sayını 3-ə çatdırıb. Bu şüşənin istehsalı üçün “Borjomi”nin qablaşdırma zavodlarında texnoloji xətlər yenidən qurulub.

Dizaynerlər ənənəvi ştrixləri saxlamağa çalışsalar da, şüşənin forması dəyişib. Bununla belə, dünya şöhrətli “Borjomi” brendinin yeni şüşəsinin həcmi dəyişməyib - 0,33, 0,5 və 1 litr. Yenilənmiş qab yenə də şüşə və açıq yaşıl plastmasdan ibarətdir.

“IDS Borjomi Qruziya” şirkəti yeni şüşənin dizaynı üzərində işlərə 2010-cu ilin əvvəlində başlayıb. Həmin ilin noyabrında “Borjomi” mineral suyunun istehsalına başlanmasının 120 illiyi münasibətilə Borjomi şəhərində yeni şüşə təqdim olunub.

“IDS Borjomi Qruziya” şirkətinin rəhbəri Zaza Kikvadze bildirib ki, yeni şüşənin yaradılması ideyası dünyanın müxtəlif bazarlarında aparılan çoxsaylı tədqiqatların nəticəsidir: “Bizim istehlakçılar “Borjomi”dən müasir qablaşdırmada nəsə tələb edirdilər. Bu, bizim üçün geri çevrilməsi mümkün olmayan siqnal oldu və yeni dizayn üzərində işlərə başladıq. Artıq 2010-cu ilin sonunda istehlakçıların tələbini yerinə yetirdik və bazarda yeni şüşə peyda oldu. Qeyd etməliyəm ki, gürcü istehlakçılarımız bu yeniliyi sevinclə qəbul etdilər. Yeni şüşə bütün ümidləri doğrultdu. Ümid edirəm ki, şüşə azərbaycanlı istehlakçılarımızın da xoşuna gələcək”.

Yeni dizaynlı şüşələr “Mina” SC tərəfindən Ksansk Şüşə Zavodunda istehsal olunur. Bu ilin may ayından etibarən gürcü şirkəti ilə yanaşı, Azərbaycanın “InterGlass” şirkəti də şüşə qabın istehsalçısı olacaq. Plastmas qablar Almaniya və Fransa istehsalı olan maşın və qurğularda istehsal olunur.

Bu il “Borjomi” markasının yeni şüşəsinə mineral suyun ixrac olunduğu 30 ölkənin hər birində rast gəlmək mümkün olacaq.