Sahibkarlıq

Ana səhifə

Sahibkarlıq

Bakıda Azərbaycan Korporativ İdarəetmə Standartları ilə bağlı sahibkarların məlumatlandırılmasına dair növbəti tədbir keçirilib

29 mart 2011 11:45 (UTC +04:00)

Bakı. Nicat Mustafayev - APA-Economics. Bu gün Azərbaycan İqtisadi İnkişaf Nazirliyinin təşkilatçılığı ilə Bakıda Azərbaycan Korporativ İdarəetmə Standartları ilə bağlı sahibkarların məlumatlandırılmasına dair növbəti tədbir keçirilib.

Nazirlikdən «APA-Economics»ə verilən məlumata görə, tədbirdə İqtisadi İnkişaf Nazirliyinin, Bakı Biznes Tədris Mərkəzinin, Azərbaycan Sahibkarlar Konfederasiyasının, Azərbaycan Ticarət və Sənaye Palatasının nümayəndələri, eləcə də sahibkarlar iştirak edib.

Korporativ İdarəetmə Standartlarının təqdimatı ilə çıxış edən İqtisadi İnkişaf Nazirliyinin Korporativ idarəetmə sektorunun müdiri Anar Hacızadə bu standartların tətbiqinin sahibkarlığın inkişafına dövlət dəstəyi tədbirlərinin tərkib hissəsi olduğunu bildirmiş, şirkətlərin səmərəli, daha şəffaf idarə olunması üçün optimal fəaliyyətin təşkilinə yardım edəcəyini vurğulayaraq bildirib ki, standartların tətbiqi həmçinin, korrupsiya ilə əlaqədar hüquqpozmaların qarşısının alınması üçün şərait yaradacaq, kommersiya təşkilatlarının korporativ idarə edilməsinin təkmilləşdirilməsində yardımçı olacaq, təşkilatların fəaliyyətinin keyfiyyətcə yaxşılaşdırılmasına şərait yaradacaq.

Qeyd edək ki, Azərbaycan Korporativ İdarəetmə Standartları İqtisadi İnkişaf Nazirliyi tərəfindən korporativ idarəetmə sahəsində qanunvericiliyin təkmilləşdirilməsi üzrə yaradılmış İşçi Qrupu tərəfindən hazırlanıb. Sənədin hazırlanması prosesində İqtisadi İnkişaf Nazirliyi aidiyyəti dövlət qurumları ilə yanaşı, Beynəlxalq Maliyyə Korporasiyası ilə sıx əməkdaşlıq edib. Standartlarda korporativ idarəetmənin mahiyyəti, onun şirkətlərin səmərəli idarə olunmasında, şirkətlərə investisiya qoyuluşunun artırılmasında rolu, həmçinin səhmdarların ümumi yığıncağının təşkili, səhmdarların hüquqları, risklərin idarəedilməsi və s. əksini tapıb.