Sahibkarlıq

Ana səhifə

Sahibkarlıq

Azərbaycan və Hindistanın sahibkarlıq qurumları arasında əməkdaşlıq sazişi imzalanıb - FOTO

Azərbaycan və Hindistanın sahibkarlıq qurumları arasında əməkdaşlıq sazişi imzalanıb - <font color=red>FOTO</font>

30 mart 2011 09:40 (UTC +04:00)

Bakı. Əli Əhmədov - APA-Economics. Bu gün Bakıda Hindistan və Azərbaycan iş adamları arasında interaktiv biznes-sessiya işə başlayıb.

“APA-Economics”in məlumatına görə, Hindistanın Ticarət və Sənaye Palataları Federasiyaları, bu ölkənin Bakıdakı səfirliyi və Azərbaycanın Sahibkarlar Konfederasiyasının (ASK) təşkil etdiyi tədbirdə Hindistandan 20-dək iş adamı iştirak edir. Hindistan nümayəndə heyətinə əsasən əczaçılıq, səhiyyə və bitki məhsulları, kənd təsərrüfatı və emal olunmuş ərzaq məhsulları, toxuculuq, geyim və iplik məmulatı, inşaat materialları istehsalı və kimyəvi məhsullar sahələrində çalışan işi adamları daxildir.

Tədbirdə çıxış edən Hindistanın Azərbaycandakı səfiri Debnat Şou Azərbaycanın təbii sərvətlərinin Hindistanın da marağını cəlb etdiyini bildirərək, ölkəsinin iş adamlarının qeyri-neft sektoru ilə əməkdaşlıq etmək istədiyini qeyd edib: “Bizə məlumdur ki, Azərbaycan qeyri-neft sektorunu inkişaf etdirmək istəyir. Biz də bu sahədə öz təcrübəmizi bölüşmək niyyətindəyik”.

ASK prezidenti Məmməd Musayev son 5 ildə iki ölkə arasında ticarət dövriyyəsinin 6 dəfə artaraq 2005-ci ildəki 56 mln .dollardan 2010-cu ildə 335 mln. dollara qalxdığını bildirib: “İki ölkə arasında biznes əməkdaşlıq üçün müxtəlif sahələrdə geniş imkanlar var”.

Hindistan nümayəndə heyətinin rəhbəri, Hindistan Ticarət və Sənaye Palataları Federasiyaları İdarə Heyətinin sədr müavini Şeyla Sudakaran Hindistan iqtisadiyyatının sürətlə inkişaf etdiyini (2010-cu ildə ÜDM-in artımı 8,6% olub), yerli şirkətlərin isə fəaliyyətlərini başqa ölkələrdə genişləndirdiyini söyləyib: “Əvvəllər bizim iş adamları Avropa ölkələrinə diqqət yetirirdilərsə, indi digər ölkələrə də maraq göstərirlər. Ticarət dövriyyəsində əsasən neft-qaz məhsulları üstünlük təşkil edir. Sərmayələr isə o qədər kiçikdir ki, demək olar, əks olunmur. Azərbaycanda bir neçə Hindistan şirkəti var ki, onlar proqram təminatı sahəsində çalışırlar. Hindistanda da cəmi bir neçə Azərbaycan şirkəti fəaliyyət göstərir”.

Təmsil etdiyi təşkilata 250 min sahibkarın üzv olduğunu qeyd edən Ş.Sudakaran bildirib ki, Hindistan iş adamları Azərbaycanda kənd təsərrüfatı, informasiya texnologiyaları, telekommunikasiya, bank sektoru və əczaçılıq sahələrinə maraq göstərirlər.

Tədbirdə hər iki ölkənin sahibkarlıq qurumları - Hindistanın Ticarət və Sənaye Palataları Federasiyaları və Azərbaycanın Sahibkarlar Konfederasiyası arasında əməkdaşlıq barədə saziş imzalanıb.