Sahibkarlıq

Ana səhifə

Sahibkarlıq

Azərbaycanın orta və ali məktəblərində birgə partnyorluq layihəsi həyata keçirilir

31 mart 2011 16:05 (UTC +04:00)

Bakı. Elnur Hüseynquluyev - APA-Economics. Azərbaycanda 2011-2013-cü illər ərzində orta və ali məktəblərdə iqtisadi və biznes təhsilinə yardım etmək məqsədilə dövlət və özəl sektorlarının birgə partnyorluq layihəsi həyata keçirilir.

«Bakcell» şirkətindən «APA-Economics»ə verilən məlumata görə, koalisiyanı təşkil edən əsas dəstəkləyici şirkətlər «Bakcell Ltd», «Statoil Abşeron», «Chevron Xəzər» və «Qaradağ Sement» ASC-dir. «Paşa Bank», «Saipem Azərbaycan», ABŞ Ticarət Palatasının Azərbaycandakı nümayəndəliyi, «Nobel Oil», «Baker & McKenzie MDB» və «PWC Azərbaycan» şirkətləri isə layihənin tərəfdaşlarıdır. Partnyorluq layihəsi «Junior Achievement Azerbayjan» (JAA) təşkilatı tərəfindən Azərbaycan Təhsil Nazirliyi, Gənclər və İdman Nazirliyi, Azərbaycan Mərkəzi Bankı və ABŞ-ın Beynəlxalq İnkişaf Agentliyi ilə strateji tərəfdaşlıq çərçivəsində həyata keçirilir.

Üç il davam edəcək proqram çərçivəsində JAA ölkə üzrə 260 məktəbdə fəaliyyət göstərərək, 300 iqtisadiyyat müəlliminə təlim vasitəsilə 10490 məktəblinin tətbiqi iqtisadiyyatı öyrənməsinə imkan yaradacaq. Həmçinin 1017 məktəbli və tələbə işə hazırlıq təlimləri, iqtisadi yarışlar və praktiki təcrübədə iştirak etməklə gələcək karyera üçün zəruri bilik və bacarıqlar əldə edəcək. JAA həmçinin maliyyə savadı üzrə təlimlər və interaktiv yarışlar vasitəsilə 180 tələbəyə şəxsi maliyyə və bankçılığın əsaslarını tədris edəcək. Proqram çərçivəsində 225 orta məktəb şagirdi biznes şirkətlərini təmsil edən könüllülər vasitəsilə məktəb səviyyəsində biznes strukturlarını yaradıb idarə etməklə sahibkarlığın əsaslarını tədqiq edəcək. Biznes etika təlimləri və məsuliyyətli biznes üzrə yarışlarda iştirak etməklə 900 məktəbli etik qərar qəbul etmə qabiliyyətini inkişaf etdirəcək. Hər tədris ilinin sonunda 2605 məktəbli işgüzar etika, işə hazırlıq qabiliyyəti, maliyyə savadı və sahibkarlıq üzrə aparılan sorğularda və qiymətləndirmələrdə iştirak edəcək.