Sahibkarlıq

Ana səhifə

Sahibkarlıq

Yunanıstan Azərbaycana ixracını artırmaq niyyətindədir

06 aprel 2011 10:03 (UTC +04:00)

Bakı. Nicat Mustafayev – APA-Economics. Yunanıstan Azərbaycanla ticarət dövriyyəsini artırmaq niyyətindədir. «APA-Economics»in məlumatına görə, bunu Yunanıstan Xarici Ticarət Təşkilatının (HEPO) prezidenti Aleksandros Çolevas bu gün Bakıda keçirilən Azərbaycan-Yunanıstan biznes-forumunda çıxış edərkən bildirib.

Onun sözlərinə görə, 2010-cu ildə iki ölkə arasında ticarət dövriyyəsinin həcmi cəmi 19,5 mln. avro təşkil edib ki, Yunanıstandan Azərbaycana 9,6 mln. avroluq, Azərbaycandan Yunanıstana isə 9,9 mln. avroluq məhsullar göndərilib: «Azərbaycan Yunanıstanın xarici ticarət tərəfdaşları siyahısında 92-ci yeri, ixrac baxımından isə 79-cu yeri tutur. Ötən il Azərbaycandan Yunanıstana əsasən neft və neft-kimya məhsulları, Yunanıstandan Azərbaycana isə əczaçılıq, tikinti, kosmetika və s. məhsullar ixrac olunub. Biz yeni sahələrdə əməkdaşlıq etməklə iki ölkə arasında ticarət dövriyyəsini artırmaq niyyətindəyik, bunun üçün geniş potensial mövcuddur».

HEPO-nun rəhbəri qeyd edib ki, Yunanıstan Azərbaycana qida, tikinti və kosmetika məhsullarının ixracını artırmaq niyyətindədir: «Qida sənayesi Yunanıstanın ümumi ticarət dövriyyəsində ixracın 19%-ni, tikinti məhsulları isə 25%-ni təşkil edir. Biz məhsullarımızı Avropa İttifaqı, ABŞ və digər ölkələrə ixrac edirik».