Sahibkarlıq

Ana səhifə

Sahibkarlıq

Bakıda Azərbaycan-Yunanıstan biznes forumu keçirilib

06 aprel 2011 14:49 (UTC +04:00)

Prezidentin mətbuat xidmətindən “APA-Economics”ə verilən məlumata görə, biznes-forumda Azərbaycan prezidenti İlham Əliyev və Yunanıstan prezidenti Karolos Papulyas iştirak ediblər.

Azərbaycan və Yunanıstandan 250-dək iş adamının iştirak etdiyi biznes-forumu açan prezident İlham Əliyev Yunanıstanın dövlət başçısı Karolos Papulyasın ölkəmizə rəsmi səfərinin uğurla keçdiyini, aparılan danışıqların və imzalanan sənədlərin iki dövlət arasında münasibətlərin daha da dərinləşməsinə təkan verəcəyini vurğulayıb. Ölkələrimiz arasında siyasi münasibətlərin yüksək səviyyəyə çatdığını, dövlət başçılarının qarşılıqlı rəsmi səfərlərinin bunun əyani sübutu olduğunu qeyd edən prezident İlham Əliyev iqtisadi sahədə əlaqələrin genişləndirilməsi üçün böyük potensialın olduğunu dedi. Dövlət başçısı Hökumətlərarası Birgə Komissiyanın da bu istiqamətdə səmərəli fəaliyyət göstərdiyini qeyd edib.

İki ölkənin neft-qaz sektorunda uğurla əməkdaşlıq etdiklərini, 2007-ci ildən Azərbaycandan Yunanıstana təbii qazın ixrac edildiyini, prezident Karolos Papulyasın ölkəmizə rəsmi səfəri çərçivəsində imzalanan memoranduma əsasən Azərbaycandan Yunanıstana ixrac edilən qazın həcminin daha da artırılacağını bildirən prezident İlham Əliyev iqtisadi sahədə maraqları üst-üstə düşən Azərbaycan ilə Yunanıstanın ötən müddətdə etibarlı tərəfdaş imicini təsdiqlədiklərini vurğulayaraq, ölkələrimizin bundan sonra da iqtisadi sahədə əməkdaşlığın şaxələndirilməsi üçün səmərəli fəaliyyət göstərəcəklərinə əminliyini bildirib. Ölkə başçısı 2,2 trln. kubmetr təsdiqlənmiş təbii qaz ehtiyatı olan Azərbaycanın qaz sektoruna yeni investisiyaların qoyulacağını qeyd edərək, hər iki ölkənin iş adamlarını qarşılıqlı sərmayə yatırımlarını artırmağa çağırıb.

Yunanıstan prezidenti Karolos Papulyas bu tədbiri ölkələrimiz arasında iqtisadi əlaqələrin yüksək səviyyədə olmasının nümunəsi kimi göstərərək, Cənubi Qafqazda yüksək mövqeyə malik Azərbaycanın Yunanıstanla müxtəlif sahələrdə əməkdaşlığının böyük potensiala malik olduğunu vurğulayıb. O, ölkələrimiz arasında enerji sektorunda mövcud əlaqələri yüksək qiymətləndirib.

Forumdan sonra prezidentlər İlham Əliyev və Karolos Papulyas Dənizkənarı Milli Parkda paytaxtın mənzərəsini seyr ediblər.

Yunanıstanın dövlət başçısına son illərdə sürətlə inkişaf edən Azərbaycanın paytaxtında həyata keçirilən abadlıq və quruculuq işləri barədə ətraflı məlumat verilib.