Sahibkarlıq

Ana səhifə

Sahibkarlıq

Ankarada Türkiyə-Azərbaycan biznes-forumu keçirilib

15 aprel 2011 13:45 (UTC +04:00)

Bakı - APA-Economics. Bu gün Ankara (Türkiyə) şəhərinin “Swissotel” mehmanxanasında Türkiyə-Azərbaycan biznes-forumu keçirilib.

Azərbaycanın Türkiyədəki səfirliyindən “APA-Economics”ə verilən məlumata görə, forumda Azərbaycanın iqtisadi inkişaf naziri Şahin Mustafayev, Türkiyənin xarici ticarət naziri Zəfər Çağlayan, Azərbaycanın Ankaradakı səfiri Faiq Bağırov, Türkiyədən və Azərbaycandan olan iş adamları iştirak ediblər.

Forumda çıxış edən Azərbaycanın iqtisadi inkişaf naziri Şahin Mustafayev Azərbaycan prezidenti İlham Əliyevin Türkiyə ilə əlaqələrə verdiyi əhəmiyyətdən, iki ölkə arasındakı yaxınlıqdan, Azərbaycanda gedən sürətli iqtisadi inkişaf tempindən, ölkəmizin Ermənistanın təcavüzünə məruz qalmasına baxmayaraq, regional, eləcə də beynəlxalq əməkdaşlığa verdiyi əhəmiyyətdən və bu kimi biznes-forumların təşkilinin ikitərəfli əlaqələrin inkişafına müsbət təsirindən danışıb.

Nazir Heydər Əliyevin “Biz bir millət, iki dövlət” və Mustafa Kamal Atatürkün “Azərbaycanın sevinci Türkiyənin sevinci, Azərbaycanın kədəri Türkiyənin kədəridir” sözlərinin Azərbaycan və Türkiyə əlaqələrini çox dəqiq xarakterizə etdiyini vurğulayıb.

Türkiyənin xarici ticarət naziri Zəfər Çağlayan Azərbaycan-Türkiyə əlaqələrinin bir örnək olduğundan, iki ölkə arasında ticarət dövriyyəsinin daha yüksək səviyyəyə çıxarılmasının əhəmiyyətindən və bunun üçün yüksək əzmlə çalışmalara başlamağın zəruriliyindən söz açıb.

Tədbir zamanı Türkiyənin Ticarət Palataları və Birjalar Birliyi (TOBB) ilə Azərbaycan Sahibkarlar Konfederasiyası arasında əməkdaşlıq protokolu imzalanıb. Daha sonra Türkiyə və Azərbaycandan olan iş adamları arasında ikitərəfli əməkdaşlıq müzakirələri keçirilib.

Tədbirin sonunda iqtisadi inkişaf naziri Şahin Mustafayev Ankarada təhsil alan bir qrup azərbaycanlı tələbə ilə görüşüb.