Sahibkarlıq

Ana səhifə

Sahibkarlıq

Avropanın avtomobil bazarı bu ilin I rübündə 3%-dən çox azalıb

19 aprel 2011 13:44 (UTC +04:00)

Bakı - APA-Economics. Avropada minik avtomobillərinin satışı cari ilin I rübündə 3,2% azalaraq 3,58 mln. ədəd təşkil edib.

“APA-Economics”in xəbərinə görə, ötən ilin mart ayı ilə müqayisədə 2011-ci ilin mart ayında azalma 5% olub.

Avropa İttifaqının (Aİ) ən böyük avtomobil bazarı olan Almaniyada bu ilin I rübündə 14% artım qeydə alınıb. Bu ölkənin avtomobil dilerləri ötən ilin müvafiq dövrü ilə müqayisədə 93 min ədəd çox - 763 min avtomobil satıblar. Fransanın avtomobil bazarında isə artım 8,9% təşkil edib - 647,5 ədəd. Lakin digər ölkələrdə ciddi azalma müşahidə olunduğundan, Aİ-nin avtomobil bazarının liderləri ümumi göstəricini mənfi olmaqdan xilas edə bilməyiblər.

Böyük Britaniyanın avtomobil bazarında 8,7% (558,3 min avtomobil), İtaliyada 23,1% (513,7 min), İspaniyada 27,3% (208 min) azalma qeydə alınıb. Baltikyanı ölkələrin avtomobil bazarları isə kiçik olmasına baxmayaraq, artım tempinə görə liderlik edirlər. Burada iki dəfədən artıq artım müşahidə olunur, bazarın həcmi isə hər rübə 2-3 min ədəd avtomobil təşkil edir.

Konkret markalara gəlincə, Almaniya və Yaponiya istehsalı olan avtomobillər liderliklərini möhkəmləndirirlər. Bazarın şəriksiz lideri “Volkswagen Group” (VW, “Audi”, “Skoda”, “Seat”) satış həcmini 5,6%, BMW 11,2%, “Daimler” 3,6%, “Nissan” 20%, “Mitsubishi” 32,8%, “Lexus” 17,5% artırıb. “Toyota”nın birmənalı dinamika nümayiş etdirməməsinin müqabilində Aİ-də Fransa, İtaliya və ABŞ istehsalı olan avtomobillərin satışı aşağı düşür.