Sahibkarlıq

Ana səhifə

Sahibkarlıq

Azərbaycanda süd məhsullarının istifadə müddəti uzadılıb

20 aprel 2011 10:20 (UTC +04:00)

Bu barədə «APA-ECONOMICS»ə açıqlamasında Standartlaşdırma, Metrologiya və Patent üzrə Dövlət Komitəsindən məlumat verilib.

Komitənin «Kəsmik», «Ayran», «Qatıq», «Dovğa» dövlət standartlarına etdiyi dəyişikliklər nəticəsində bu məhsulların maksimal istifadə müddəti uzadılıb. Belə ki, yeni standartların qəbul edilməsindən əvvəl kəsmiyi +8 dərəcə temperaturda 36 saat, yəni 1,5 sutka saxlamaq mümkün idisə, yeni standarta görə onu +2+6 dərəcədə 14 sutka, -18 dərəcədən yuxarı olmayan temperaturda isə 4 ayadək saxlamaq mümkündür. Başqa sözlə, kəsmiyin saxlanma müddəti təqribən 10 dəfə uzadılıb.

Ayran məhsulunu əvvəl +2+6 temperaturda 7 sutka saxlamaq mümkün idisə, indi bu müddət 3 dəfə uzadılaraq 20 sutka müəyyən edilib. Eyni şəraitdə saxlama müddəti 7 gün olan dovğanın yararlılıq müddəti 14 sutkayadək artırılıb, qatığın isə 14 sutka müəyyənləşdirilib.

Komitədən «APA-ECONOMICS»ə verilən məlumata görə, yararlıq müddətinin uzadılması istehsal texnologiyasının inkişafı, Avropanın qabaqcıl istehsal avadanlıqlarının Azərbaycana gətirilib quraşdırılması ilə bağlıdır. Bundan başqa, məhsulların qablaşdırılmasında yüksək standartlara uyğun qablaşdırma materiallarının istifadə olunması nəticəsində bu qablaşdırılma məhsulun uzun müddət ərzində keyfiyyətli saxlanmasını təmin edir. Məhsulun tərkibinə qida əlavələrinin vurulması da (Səhiyyə Nazirliyi ilə razılaşdırılmaqla) bu məhsulların saxlama-yararlıq müddətinin uzadılmasına imkan verir.

Komitədən bildirilib ki, yararlılıq müddətinin uzadılması istehsalçılar və sahibkarlar üçün yaradılmış əlavə fürsətdir. Çünki bundan əvvəl istehsalçı bu məhsulu çox keyfiyyətli istehsal etsə də, qüvvədə olan standartın tələbi ilə həmin məhsulun üzərində yalnız standartın yol verdiyi müddəti göstərə bilirdi: «Bu isə son nəticədə hələ keyfiyyətli və istismara yararlı olan məhsullarının satışdan çıxarılıb atılmasına səbəb olub».

Yeni standartlara əsasən, məhsulların saxlama müddətinin artırılması istehlakçıların sağlamlığı üçün təhlükə yaratmayacaq: «Bu, Səhiyyə Nazirliyi ilə rəsmi razılaşdırılmış göstəricilərdir».